Tuesday, June 3, 2008

إيكش تولع

الناس اللى ماتت دى ماتت علشان وهم . الناس اللى حلمت كانت غلط لإن الحقيقة كابوس مايتصلحش . الكل فى البلد دى فران بتاكل فى الخشب ناسيين إن المركب مسيرها فى يوم هاتغرق . الكل يلا نفسى و الكل هو بس اللى صح و الكل هو مصر و الباقى خونة .
و مصر مش هى أمى لأ و لا حتى مرات أبويا و لا تنفع تبقى جارة . مصر دى شئ كريه . مادتش حد حاجة و المهم إنك تهبش قبل ما تتهبش . و لا إحنا مش مصريين إحنا اللى فيه عرق تركى و عرق إنجليزى و عرق عربى من الأشراف المهم يكون فيه عرق من طينه غير طينة أهل البلد . إحنا مش بنتكلم مصرى ، إحنا بنتكلم فرنساوى باريسى و إنجليزى أمريكانى . و حتى هندى المهم نرطن رطن غير مفهوم .
إحنا مش مصريين ، إحنا مسلميين مكفرين و مسيحين مضطهدين .
و مش إحنا اللى إنتصرنا فى 1973 لإن الإسرائيليين زى ما كل الناس عارفة ناس بتسيب الأرض بعد ما يحققوا الإنتصار . الناس اللى ماتت دى ماتت علشان وهم لإنهم كانوا ممكن يفضلوا عايشيين و الأرض راجعة راجعة .
الناس اللى طلعت سنة 1919 دول كانوا ممثليين لإن المسيحين المصريين و المسلميين المصريين مش متفقين . و من كثر الكلام عن الوحدة الوطنية المصريين صدقوا إنهم نصين محتاجين وحدة .
مش عارفة أنا زعلانة ليه . ما تولع . حتى إن طلعنا سلالة من العبيد للقرش . ماتولع حتى إن مسك الأخ لأخوه المسدس . ما تولع ، أنا أزعل عليها لو فيها اللى يستاهل . أنا الحاجة الوحيدة اللى مزعلانى ، إن الناس اللى ماتت دى ماتت علشان وهم .
كل اللى مات و إسم مصر فى قلبه مات علشان كائن غير موجود . مسخ ممسوح الهوية . كل واحد فيه بيقول يلا نفسى . و إشمعنى أنا بقى
اللى هاقول يلا مصر . ما تولع . هى فارقة . ديتها عود كبريت و تولع ، لكن لما تولع محدش يقول إلحقوا مصر لإن مصر ماتت من زمان .

2 comments:

Dr. Ahmed Wagih said...

العزيزة شيماء؛ اولاً شكراً على تعليقك على مدونتي، ثانياً، تعليقاً على تذكرين هنا، الجيل الجديد قصدي كل من هو دون 30 سنة نشأوا على قيم مختلفة، فعلى سبيل المثال، عندما كانت روتانا زمان تعرض فيلم قصر الشوق (على ما اتذكر) وفيه مشهد اتحاد الهلال مع الصليب، كانت التعليقات في الشريط اسفل الشاشة تنتقد المشاهد وتعتبرها كفر!!!!

انا عمري 44 سنة، انا وجيلي اتربينا على شعار الدين لله والوطن للجميع. الآن يوجد من يقول بكفر هذا الشعار. وانا اعتقد ان اننا كمسلمين مسئولين عن اي شرخ في الوحدة الوطنية؛ هل يعقل ان ينتخب الشعب المصري نائب مسيحي واحد فقط من اصل 444 نائب منتخب في مجلس الشعب ؟ لماذا لا يصدر القانون الموحد لبناء دور العباد’؟ لماذا توجد خانة الديانة على البطاقة الشخصية؟ لماذا يحرم الأقباط من التعيين في قسم النساء بطب القصر العيني؟ الخ..

Shimaa Gamal said...

المشكلة عمرها ما كانت فى المصريين . المشكلة فى الأفكار المستوردة . الإسلام الوهابى اللى إنتشر و بقى النسخة الوحيدة من الإسلام . التعصب القبلى المستورد من الجزيرة العربية .
خانة الديانة طول عمرها موجودة بس عمرها ما كانت أهم خانة ، لإن الديانة فى مصر دائماً مصرى . الإسلام و المسيحية فى مصر نسخ مخصوصة من كل دين .
المشكلة إن المصريين بطلوا يبقوا مصريين .
الظاهرة المطمئنة إن لو التعليقات أسفل الشاشة بتقول بكفر الشعار معنى كده إن الفكر التخلفى الوهابى مضروب فى قلبه لإنهم عندهم الأفلام و التلفزيون حرام .

و على فكرة الذنب مش ذنب الجيل ، ذنب اللى نسيوا يربوه فطلع فى قلبه كل حاجة إلا بلده .