Tuesday, June 10, 2008

وقفة مصيرية

الحكومة الرشيدة قررت بدء حملة للسيطرة على الزيادة السكانية . مع إن لو الحكومة صبرت الناس هتموت من الجوع لوحدها و لكن نقول إيه ، خلق الإنسان عجولا و بإعتبار السادة الوزارء و القائمين على الهيئات التنفيذية و التشريعية من بنى الإنسان فهما مش عارفين يصبروا مع إن الصبر جميل .
المهم ، خير اللهم إجعله خير قال الشعب المصرى لسه بيزيد . تقريباً برضوا الحكومة ماتعلمش إن الشعب المصرى بطل جواز و اللى بيتجوزوا بطلوا خلفة أو قاطعين الخلف و الحمد لله .
فاعيزين اللى لسه له شوق للخلفه مايعملهاش . فعملوا حملة ذات عنوان لطيف . "وقفة مصرية " علشان نتعلم كلنا و نشبع كلنا و نتعالج كلنا و نستريح كلنا و نشرب كلنا و نشتغل كلنا .
قبل ما نزيد مولود نتأكد إن حقه علينا موجود .

اللهم أخزيك يا شوشو . الحكومة دى أنا بقول عليها غبية من زمان . بس دلوقتى بس إتأكدت . إن الغباء كلمة بسيطة . هو السادة القائمين على الحملة محدش جه فى دماغه إن خير اللهم أجعله خير فرضنا الكلام ده جه على هوى أشخاص معينة و قرروا يقفوا وقفة مصرية مصيرية علشان ناكل كلنا و نتعلم كلنا و نستريح كلنا و نتعالج كلنا . بس قرروا يعملوا الحاجات دى بالطريقة الصح مش إنهم يبطلوا خلف لأ يقطعوا دابر اللى قطعوا خلفهم . الحكومة ساعتها تعمل إيه .

سكتنا على مصر اللى بتتقدم بينا و على الشباب اللى بيحب مصر و طلع باقى المصريين ولاد ستين فى سبعين بيكرهوا أم البلد دى . دلوقتى لازم نقف وقفة مصرية .

أنا مش فاهمة الحكومة دى هاتفضل تلون علينا لحد إمتى ؟

أنا كمواطنة مصرية صالحة أطالب الحكومة بوقف تداول شعار الحملة و محاكمة القريحة اللى طلعت بيه بتهمة محاولة قلب نظام الحكم . أنا لو بحكم البلد دى هاعمل كده . بس أنا نسيت ، أنا لو بحكم البلدى هاعمل كده علشان عايشة فى مصر اللى الناس هاتفهم فيها الوقفة على إنها وقف الحال المايل مش وقف الخلف لكن الحكومة اللى رافعة الشعار ده عايشة فى مصر تانية .

يا حكومة ، ماذا لو حكم الشعب المصرى عقله ؟؟

حكموا عقلكم مرة و إرحموا من فى الأرض يرحمكم من فى السماء

2 comments:

hend...hanady said...

كل شوية يقولوا تضخم سكانى وتحديد النسل وغيره طب ما عدد سكان امريكا اكتر من عدد سكان الوطن العربى على بعضه يعمله 400 مليون والصين والهند ما عدوا من زمان هتقولوا مساحتهم تسمح واحنا كمان مساحتنا تسمح بعددنا ده واكتر المشكلة مش مشكلة تضخم سكانى ادى لارتفاع البطالة والفقر والجوع لاخره زى ما الحكومة ديما بتعلق مشاكلها على الشماعة بتاعت التضخم الكارثة اننا عندنا سوء استخدام موارد سواء بشرية او كارض وغيره يعنى ليه الحكومة مش بتستغل باقى مصر الواسعة اوى والشباب هيساعد هتقولوا ماهى عملت فى سينا وبعدين عجزت الشباب وباعتها لمستسمرين ظلعوا يهود وبعدين هو تحط ايدها فى مشروع ومجرد ما يبتددى ينهوه وكده خلاص لازم كل شئ يكمل للاخر والذكى مش اللى يعلق مشاكله على شماعة الذكى اللى يستغل ظروفه كويس للنفع بدل ما نتلكك به

Shimaa Gamal said...

أهلاً يا هند
عندك حق ، المشكلة الحقيقية مش بس فى الزيادة السكانية . يعنى الزيادة السكانية قد تكون مشكلة بس مش هى البعد الوحيد للأزمة . هى مشلة أولاً لإن الأساليب المتبعة لحلها أساليب عقيمة و مالهاش علاقة بالواقع . ثانيًا مشكلة لإن السكان مورد من الموارد و زى ما إنت قلتى عندنا أزمة إدارة موارد . الحقيقة عندنا أزمة إدارة فى كل حاجة .

نورتينى