فاصل فضفضة

في المعتاد يأتي عفريت الفضفضة بلسان إنجليزي طلق، لكن هذه مرة من مرات نوادر يأتي فيها العفريت مصريًا فصيحًا. ورغم ما قد يجلبه هذا اللسان المصري الفصيح إلا إن الكلمتين محشورين في قلبي لازم يطلعوا.

أمضيت جزء لا يستهان به من عشريناتي وثلاثيناتي وانا راغبة في الزواج. انا كنت واعية جدًا لكوكتيل الإحتياجات العاطفية والجسدية والإجتماعية اللي مافيش حاجة في هذا الجزء من العالم ممكن تلبيها إلا الزواج.

اه .. كنت عايزة اتجوز!

والرغبة دي قوبلت بالإستهجان من كل الرجال اللي قابلتهم (إلا قليلا) يعني ايه عايزة تتجوزي .. الجواز ممل لازم نعمل علاقات غير تقليدية (عط). والرغبة دي كمان قوبلت بالإستهجان من الستات .. يعني إيه عايزة تتجوزي الجواز ممل عيشي حياتك (مش عارفة هو انا ميتة ولا ايه).

وطبعًا هذه الرغبة تم استغلالها من الكثير من الرجال .. كانوا شايفين اني هدف سهل لمحاولات الشقط .. الخ

ما انا على رأسي بطحة كبيرة اسمها عايزة اتجوز

وطبعا الرغبة دي برضه خلت الكثير من الرجال يزنقوني في الفريند زون .. لإن ماحدش فيهم عايز وجع دماغ مادام مش عايزة عط خليكي كده على رف الصداقة اهو يمكن تنفعي في يوم من الأيام.

وده بقى اللي وصلني لنقطة مهمة جدًا ..

أنا مش عايزة أتجوز خلاص!

أنا حياتي كده حلوة جدًا، وكوكتيل الإحتياجات المنتظرة للإشباع انا متعايشة معاها ومش بتمثل اي نوع من انواع الضغوط. 

انا لا عايزة اتجوز ولا عايزة اعط ولا محتاجة اصدقاء ذكور جدد.

فلو انت ذكر .. وشايف انك عايز تتعرف .. وفر على نفسك الرفض ووفر عليا انا حرقة الدم

اه .. محاولتك عزيزي الذكر انك تشقطني بتتسبب في فوران دمي .. وببقى عايزة اشتم اللي جابوك واللي خلفوك لولا ان ده هيبقى رد درامي يمكن يحسسك بقيمة في نفسك وانت ولا تسوى 

وماحدش يتبرع ويجيبلي عرسان .. لقد ورمت رجالة ركش. ولقد ورمت من فكرة ان اي ذكر وانثى ينفعوا يركبوا على بعض.

واه I have no match  and it is totally fine 

انا مش عايزة اتجوز .. ومش عايزة اعط .. ومش عايزة احب .. ومش عايزة صديق

انا راضية ومرتاحة .. ولما ده يتغير I will let you know