الملهمون

من كام يوم صديقة كتبت تجربة ملهمة مع / عن أحد ملهميها. القصة اللي كتبتها كأنها كانت بتحكي عني وعن ناس عدوا في حياتي. في منهم اللي اتصرف بالضبط تصرف ملهمها وفي اللي اتصرف بطريقة مختلفة.

ملهما لم يكترث لكونه مصدر الإلهام، بعض ملهميني لم يكترثوا. بعضهم غضب لكونه مصدر الإلهام وبعضهم مر بحالة من التناحة، اللي هو انا مبسوط بس مش عارف المفروض اعمل ايه. متشكر يعني بس ما تحرجنيش.

كنت في الأول بحرص اني اقول لكل واحد الكلام المكتوب عنه/ له/ بوحيه. لكن مع الوقت بطلت. أحيانا في منهم بيعرف من السياق وبيغضب، مش لكونه مصدر إلهام على ما اعتقد قد ما بيغضب لنوع الفكرة والمشاعر اللي كان السبب فيها. 

عندي صديق قال من فترة اننا ملعونين بالكتابة. بيشدنا للناس وفي الناس رغبتنا الأصيلة في اكتشاف نفسنا. علشان اكتشاف نفسنا بيطلع أفكار جميلة على الورق. واحنا مدمنين للأفكار الجميلة على الورق.

مش بنحب ملهمينا قد ما بنحب أثرهم في كتابتنا. وأحيانا أحيانا بنبقى عايزين نوريهم قد ايه هم جمال .. 

مش كلهم يستاهلوا يعرفوا :)