لسبب ما - هقول إني ما أعرفوش رغم إني عارفاه كويس - مسيطر عليا فكرة إني ما عملتش حاجة صح في حياتي.
كل قرار أخدته في حياتي كان غلط.
كنت غلطانة لما رفضت إن بابا يتجوز بعد ماما. كتبت عليه الوحدة وكتبت علينا علاقة زي طبق الإسباجيتي.
يمكن لو كان إتجوز كان على الأقل علاقتي بإخواتي ما بقاش فيها التعلق المرضي (من ناحيتي).
كنت غلطانة لما رفضت الجواز .. جدي الله يرحمه كان جايبلي عريس لقطة. كنت غلطانة إني رفضته. كنت غلطانة إني كنت شايفة الجواز مش مهم. كنت غلطانة إني بدور على الحب والراجل اللي يشتريني لشخصي مش ك package
كنت غلطانة .. يمكن لو كنت إتجوزت كان بقى ليا حياة مستقلة. يمكن لو كان عندي عيال كانت رؤيتي للأشياء إتغيرت. يمكن لو كان عندي جوز كانت رحلتي في الحياة إتسهلت .. يمكن ويمكن.
كنت غلطانة لما إشتغلت مع بابا ثم خالي وكنت غلطانة لما سبتهم. كنت غلطانة في كل قراراتي المهنية. وكنت غلطانة لما رجعت الشغل لما بابا مات .. كنت غلطانة.
كنت غلطانة في كل حاجة .. مافيش حاجة عملتها صح. ماكنتش أعرف أحسن من كده. ومافيش مجال لتعديل الأثار.
مافيش مجال غير تسديد مستمر لفواتير قرارات أخدتها وأنا لا أتجاوز ال ١٦ سنة وال ٢١ سنة وال ٢٥ سنة ..
كنت غلطانة .. ومش عارفة أعيش إزاي وليه
No comments:
Post a Comment