الفكرة مش إني بآخاف أكون مملة ، الفكرة إن خايفة أكون مش أكثر من تسلية
أنا من حقي أقول من حقي
من حقي أقلق و أسأل أسئلة غبية
و من حقي أخاف
و من حقي إنك ماتزهقش و من حقي إني ما أتهزقش
من حقي إني أقول اللي بأفكر فيه و من حقي إنك تسمعني
و من حقي إنك ماتهربش و ماتزعلش
من حقي رد مطمئن . من حقي نوع من التأكيد إني مملة بس مسلية . إني جد مش هزار .
من حقي إني أشك و من حقي إنك تنفي .
من حقك إنك تسيبني أحبك .
من حقك إني أحبك و مش من حقك تقاوم .
سيبني أحبك ، مش هاتموت ... هنعيش
2 comments:
فعلا الواحد بيخاف ان الكلام اللي بيقوله أو بيكتبه هو مجرد كلام الناس بتتسلى بيه وبس ومش بتحاول تفكر فيه تحياتي
http://hekaty.blogspot.com/
أولا شكرًا على الزيارة و التعليق يا ياسمين و أسفة على التأخر في الرد .
ثانيا ، الناس في المعتاد بتتسلى . إلا في الحالات النادرة :)
منورة المدونة
Post a Comment