هي و هو ... و هو ... و هم

في فيلم دعاء الكروان ، تجلس زهرة العلا و فاتن حمامة . هنادي و آمنة في بيت العمدة اللي نزلوا عليه ضيوف في رحلة هروبهم من قرية الفضيحة . كان في ست بتشوف البخت . و يدور حوار حول واحد من دمها و سيؤذيها و واحد أذاها و روحه فيها  . تنصت هنادي بإهتمام للنبوءة و تعلق آمنة في النهاية لتهدئة روعها دول كلمتين لك و لغيرك . كل راجل بين حرمتين و كل حرمة بين راجلين .

المثلثات العاطفية هي ملخص حكمة أبو فراج الشهيرة ، الدنيا مابتديش محتاج .

واحد و واحدة . و مشاعر لطيفة . قوية من طرف و غير مستقرة من طرف . الطرف الغير مستقر دائما في حاجة إلى مشاعر قوية ، و لكن من طرف ثالث مشغول في الأغلب بطرف رابع . أطراف كثير ، كلها مثلثات ، مكونة في النهاية لدائرة كبيرة من وجع القلب .

الإحتياج هو الوقود المغذي لدوائر المثلثات العاطفية .

هي بتحبه ، و هو مش بيحبها كفاية . يظهر فارس يحبها . ماتقدرش تقوله لأ . ماتقدرش تقوله أه . تقدر مشاعره جدا اللي جت في وقت قاتل . تقع صريعة بين هواها و عقلها . هواها اللي بيعذبها و عقلها اللي بيأنبها . شبح الوحدة يشل تفكيرها . و تقف بلا قرار .

ما بين من تحبه و من يحبها ، و أخرين ينتظرون في طابور الرغبة .

هو بيحبها ، بس مش قادر يديها اللي محتجاه . و في واحدة مش بيحبها بس مضطر يلبي مطالبها . و في نساء ، يملئن وحدته بوحدة أكبر . ما هو إلا ماكينة لتمزيق القلوب ، فقط لإنه مش شجاع كفاية لكسر القلب الوحيد الذي يستحق الكسر .

دائرة مفرغة من وجع القلب ...