في أخر سنة في الكلية وفي محاضرة محاسبة تكاليف ولإن عددنا قليل الدكتور كان بيدردش معانا عن أحلامنا وخططنا المستقبلية.
لما جه الدور عليا أجاوب كانت خطتي واضحة جدا. تخطيط للدراسة المستقبلية و الأماكن اللي لازم أشتغل فيها علشان أوصل لنقطة معينة في مسار عملي بعد 10 سنين.
الخطة كمان كان فيها جواز بعد سنة أو إثنين من التخرج و الطفل بعد خمس سنين من الجواز.
لإني كنت واعية لإحتياجي العاطفي و كمان واعية إن طفل بدري سيؤثر بالسلب على خطة الدراسة والعمل.
أستاذي وقتها قال إن الحياة الحقيقية مش كده وإن خطتي طموحة جدا. ولم تأخذ في الحسبان عامل تعقيدات الحياة.
ضحكت وقتها وقلت لأستاذي إني هأقابله بعد 10 سنين و هبقى بالضبط مكان ما أنا عايزة.
السنة دي يبقى بقالي 14 سنة متخرجة من الكلية.
درست بعد التخرج حاجات كثير لكن لم أنهي دراستي المخططة لإن وببساطة لم أستطيع تحقيق شرط المسار العملي.
لم أتزوج لا بعد سنتين من التخرج ولا بعد 14. لم أنجب طبعا.
إحتياجاتي العاطفية نزلت من مطلب الزوج والشراكة لمجرد حد يصبح عليا. أو بلاش يصبح حتى. أنا هصبح وهو يرد الصباح.
حاجات كثير قوي إتغيرت .. مش مفتقدة الأحلام التي لم تتحقق.
لكن مخنوقة من الزنقة في ركن الإحتياج.
رغم إني واعية وقادرة في معظم الوقت على التعامل مع نوبات الإحتياج. إلا إنها بتتغلب عليا أحيانا .
الصباح والمسا والكلمة الكويسة .. دول بس اللي مفتقداهم من خطتي الطموحة التي ذهبت أدراج الرياح.
2 comments:
الحمد لله عمري ما حطيت خطط والحمد لله عمري ما بذلت مجهود في مذاكرة ولا دراسة وكنت شايفة المستقبل بالظبط زي ما حصل مع انه طلع اسوا كمان من توقعاتى السلبية
انا ما اقدرش اقول انه أسوء . لو علمتم الغيب لأخترتم الواقع.
لكن طبعا رصيد الإحباط عندي عالي :)
ومش عارفة أعيش من غير أحلام
صحيح قللت التخطيط
لكن الأحلام لسة بتعكنن عليا الواقع :)
بس ما اقدرش اقول اني زعلانة
بس مزنوقة في ركن مش عارفة اخرج منه
Post a Comment