تعليق سياسي عابر

أنا فلول!

أو بمعنى أصح جعلوني فلولًا. لإني وبمنتهى البساطة كنت ضد "أحداث يناير" التي يفضل البعض إطلاق لقب ثورة عليها. ليه أحداث ومش ثورة؟ لإنك لا يمكن تقيم نتائج حدث في أثناء حدوثه. أحداث 25 يناير كانت موجة إحتجاجات. لكن لإن بعض المشاركين فيها حياتهم ينقصها المعنى فأطلقوا عليها "ثورة" ولإن بعض اللاعبين السياسين مستفيدين من إطلاق لفظة "ثورة" على الأحداث فبقوا بيقولوا عليها ثورة. لكن يناير أحداث، أحداث مؤسفة في أغلبها. والدليل إن بعد 4 سنين لسة الفاتورة بتدفع ولسة هتدفع.

نقطة ومن أول السطر ..

أنا فلول من أيام ما بن علي وقع. الناس كانت مبتهجة بنزول الجيش في تونس ومستنين الجيش ينزل في مصر. طبعًا غلبنا نقول مصر ليست تونس. مش معنى تشابه الأحداث إن النتائج هتكون واحدة. لكن المشاركين في مظاهرات يناير قرروا تكرار السيناريو التونسي. نادوا على الجيش المصري. طلبوا من الجيش "القيام بدوره الوطني".

مشكلة الجيوش، الجيوش الحقيقية مش الجيش التونسي، إنك يجب أن تستدعيها للقيام بمهمة محددة. اللي حصل إننا في مصر قررنا ننادي على الجيش للقيام بمهمة غير محددة وهي إنقاذ الوطن.

في الوقت اللي المشاركين في أحداث يناير كانوا بيتصوروا مع الدبابة أنا كنت بعيط. لإن مكان العسكري ده مش شوارع القاهرة. مكان العسكري الجبهة ضد العدو. وجود جندي مصري بكامل تجهيزه داخل العاصمة في وضع إستعداد للقتال له معنى واحد، مصر في خط الدفاع الأخير.

المشهد اللي كان مبهج ومفعم بالأمل لناس كثير، كان بالنسبة لي كارثي.

إيه ممكن يكون أسوء من دولة معطلة وكائن عمره 7000 سنة على ركبه راكبه عيال صغيرة بتهلل وغير واعية لأي شئ؟

الأسوء من ده كله إن إستدعاء الجيش تبعه إستعداء للجيش. الشئ الذي لم يتوقعه المشاركون وتوقعته أنا بصفتي "فلول". في حين إن الأطراف المتصارعة على جثة مصر كان هدفها إزاحة الجيش بأي ثمن للسيطرة على الجثة اللي واقف يحميها. انا كنت خايفة على الجيش والجثة. لإن من غير الجيش هنوصل لنقطة الحرب الأهلية بسرعة.

اه ومن أسباب إني فلول إني من قبل ما تطلع الحرب الاهلية موضة وانا شايفة ان مصر في اتجاه لحرب أهلية. في ضمانات قليلة تمنع حدوثها لكن وجود الضمانات لم يكن ليعني عند أي لحظة من يناير 2011 إننا not running the risk

ومن الأسباب كمان إني فلول. ان في الوقت اللي كانوا ناس مفروض دارسين اقتصاد بيقولوا ان الاقتصاد هيستفاد من يناير انا كنت شايفة انهيار اقتصادي.

الفكرة بسيطة جدا، ممكن تفتح اي كتاب في مبادئ الاقتصاد وهتلاقي ان الرخاء الاقتصادي مرتبط بالاستقرار السياسي. ويناير موجة من عدم الاستقرار فطبيعي الاقتصاد يتأثر.

الكوميدي ان انصار يناير، والذين قاموا بالثورة لأن مبارك خرب الإقتصاد، قالوا بأن الإقتصاد قوي ولن يتأثر.

وده سبب كمان ليه أنا فلول. فلول علشان مش بقول كل حاجة والعكس.

ليه انا فلول؟

علشان انا شفت الخراب و قيمته من غير ما اخوض التجربة. عندي وعي بطبائع الاشياء ومعرفة كافية بالتاريخ المصري و بأمور الدولة المصرية.

معلوماتي عن مصر مش من تقارير الأمريكان وتحليلي للشأن المصري غير مبني على نماذج أمريكا اللاتينية.

أنا فلول لإني وببساطة مش هقول أصل اللي احنا فيه ده بسبب فلان وفلان والمفروض كان يحصل كذا. لإن وببساطة الكذا ده هو عين ماء البطيخ. جهلك بطبائع الأمور لا ينفي مسؤوليتك عنها.

أنا فلول .. لإني زي ما صلاح جاهين قال "عاصرتها يوم بيوم لم فاتني يوم واحد"