هي: عارف إحنا مشكلتنا إيه؟
هو: إيه؟
هي: إنت.
هو: أنا؟! ومشكلتنا؟!
هي: اه .. إنت مشكلتنا.
هو: إزاي؟
هي: بالضبط كده!
هو: بالضبط كده ايه؟
هي: بالضبط كده زي الحوار ده. إنت موجود فيه لإنك مضطر. مش موجود فيه برغبة أصيلة. مش عايز تسمع الإجابة قد ما إنت عايز الحوار يخلص.
هو: *صمت*
هي: تفتكر أنا مش واخدة بالي؟ مش واخدة بالي من إنك مش عارف تلاقي كلام؟ تفتكر أنا مش واخدة بالي وإنت بتحاول تحارب الملل على حدود قعدتنا؟ تفتكر أنا مش واخدة بالي؟
هو: كل اللي بتقوليه مش حقيقي. ملل ايه وحدود قعدة ايه. انت مش بتبقي مبسوطة؟
هي: جدا. بس إنت مش بتبقى مبسوط.
هو: لو مش مبسوط مش هشوفك.
هي: إنت عايز مني ايه؟
هو: ولا حاجة ..
هي: إنت عايز كل حاجة!
هو: *صمت*
هي: تفتكر أنا مش عايزة؟
هو: *صمت*
هي: أنا عايزة .. عايزة أحكي لك. أحكي لك عنه، عنهم. عايزة أرمي عليك خوفي وقلقي. عايزة أتكور في حضنك وأنام. بس إنت مش عايز كل ده.
هو: *صمت*
هي: إنت بتسمع علشان الحوار يخلص. بتدور على آخر الحدوتة.
هو: إنت عايزة مني إيه؟
هي: ولا حاجة!
No comments:
Post a Comment