بالحجم الطبيعي

عندي صديق، كان من أقواله المأثورة: "إنت مدياني أكبر من حجمي". كنا دائما بتضايق لما بيقول كده. لإني كنت شايفة إني مدياله حجمه الطبيعي. يمر الوقت ومكان الصديق وحجمه يتغير. بفتكر كثير جملته وبفكر لو كان دلوقتي هو "حجمه الطبيعي". 

وبفتكر جملته وبفكر كثير في "الأحجام" اللي واخدها غيره. يا ترى مين فيهم واخد أكبر من حجمه ويا ترى مين فيهم يستحق مكان أوسع.  يا ترى مين فيهم قريب وأنا شايفاه بعيد ومين أقرب مما يبدو في المرآه. 

يا ترى في حجم طبيعي أصلا، ولا كله نسبي.  

ولو كله نسبي ممكن نقول ان حد واخد أكبر من حجمه، وايه يحدد النسبة المناسبة لكل واحد. 

مشكلة وجودية!

عارف المشكلة فين؟

المشكلة ان حضنك بيتي ...

حضنك هو ركني المفضل للهروب من سخافات الدنيا، حضنك هو دواء الأرق والقلق.

المشكلة ان صوتك هو الطريقة الوحيدة لإقناع قلبي بإنه يدق بإنتظام.

المشكلة انك بكلمة واحدة بتخلي الدنيا لها معنى.

المشكلة ان وجودك حيوي جدا .. رغم المسافة ومجهود البعد وادعاء الحياد.

المشكلة اني مش هقدر أكمل كده .. والمشكلة ان غير كده برضه مش هينفع.

قلتلي احنا اتقابلنا ليه؟

هرطقة!

هو: أنا مش عارف إنت إتغيرتي ليه! 

هي: *صمت*

هو: إنت عارفة من الأول إن في غيرك!

هي: *صمت*

هو: هي زيهم .. وإنت عارفة مكانك 

هي: *صمت*

هو:  *صمت*

هي:  إِنَّ اللَّهَ لاَ يَغْفِرُ أَن يُشْرَكَ بِهِ وَيَغْفِرُ مَا دُونَ ذَلِكَ لِمَن يَشَاء وَمَن يُشْرِكْ بِاللَّهِ فَقَدِ افْتَرَى إِثْمًا عَظِيمًا 

ساعات .. ساعات

ساعات ببقى نفسي أتجوز، أبقى عروسة، وألبس فستان أبيض كبير. و أعيش دور الأميرة لليلة. أبقى محور العالم ولو للحظة مزيفة.

ساعات ببقى عايزة أتخانق على ستاير ونجف وقايمة مكتوب فيها هيافات

ساعات ببقى عايزة ليلة دخلة سخيفة زي اللي البنات بيتكلموا عليها. و ببقى عايزة صباحية مليئة بالحشرية .

ببقى عايزة شهر عسل وصور كثير شكلي فيها مش نايم وقرفان ولقطات قليلة بضحك من القلب.

ساعات ببقى عايزة أنكد على واحد لمجرد إني قادرة أنكد عليه. أنكد عليه وأنا واثقة إنه مش هيروح في حتة. مش هيطفش. 

ساعات ببقى عايزة أبقى أنثى تقليدية جدا. أعيش العيشة اللي عايشها ملايين البنات.

وساعات ... ببقى أنا. 

الزوجة vs العشيقة

في حياة كل رجل إمرأتان .. واحدة بتحبه ومش مراته . و واحدة مراته و مش متأكده بتحبه ولا لأ .

يتزوج الرجال في هذا الجزء من العالم لإعتبارات عديدة ، أهمها على الإطلاق إجتماع كل الصفات التي يبغضها في المرأة في زوجته .

يشكو الرجل من المرأة الغبية ، الزنانة ، ظل أمها ، ذات الصديقات سيئات التأثير .. و لكنه يتزوجها ، علشان الظروف جت كده .

يمدح الرجل المرأة الذكية ، المتفهمة ، التي تترك له مساحة من الحرية ، التي لا تلعب ألاعيب النساء من كر و فر ، صاحبة الرأي و الشخصية التي لا تتأثر بالأم ولا الصديقات ..

لا يتزوج الرجل من هذه المرأة أبدا .. هذه المرأة هي العشيقة الأبدية ..

يتزوج بالأولى لإن الظروف جت كده .. و لا يتزوج بالثانية لإنه أو لأنها كده ..

عزيزتي المزة .. كوني له نكدية غير ذات شخصية ؛ يكن لك زوجا أبديا !

مزيدا من الفضفضة

أشعر بالعجز و الوحدة ..

أشعر بالعجز عن التفكير  .. كل أنواع التفكير .

و لا أجد من يساعدني على تهدئة خواطري .

أشعر بالعجز و الوحدة .. حتى الفضفضة للفراغ لم تعد تكفي .

أنا إنت و إنت أنا ، مين الحمار فينا ؟

ينتشر بين الكثيرين الظن بإنهم مختلفين ..
متلازمة أنا مش زي غيري . إحنا مش زي التانين .

الحقيقة إنك زي غيرك و إنتم زي كل الناس .
كل اللي بيحصل لغيرك هيحصلك بطريقة ما ، وردود فعلك على الحدث و تفاعلك مع المعطيات لن يخرج عن ردود فعل غيرك .

المشكلة الحقيقية مش متلازمة أنا مش زي غيري . المشكلة الحقيقية هي إدراك إنك زيهم و إنك ممكن تبقى زيهم .

أنا مش عايز أبقى زي حد ، مرض يصيب بعض الناس و يدفعهم دفعا للهروب من أشباح بعضها حقيقي و معظمها متخيل .

أنا مش زي حد ، أنا زي كل الناس ، أنا مش عايز أبقى زي حد .

حد فاهم حاجة ؟

ولا أنا !

من إشارات القدر

هي : أنا حلوة ولا لأ ؟

هو : اه .. حلوة

هي : أنا لطيفة ولا لأ .

هو : ساعات بتبقى خنقة

هي : بس أنا عمري ما كنت خنقة معاك !

هو: مع غيري ساعات بتبقى خنقة ، بس أه إنت لطيفة .

هي : طيب هو عدل ، إن واحدة حلوة و لطيفة تنام كل يوم معيطة من الوحدة ؟

هو : لأ ، بس إنت اللي مش راضية .

هي : أنا مش عايزة أنحرف !

هو : طيب خلاص .. إتجوزي

هي : ماحدش راضي !

هو : مستحيل .. إنت مفترية !

هي : لا ماحدش راضي .. كلهم بيمشوا

هو : * صمت * 

هي : أنا فعلًا مش عايزة أنحرف .. 

هو : بصي .. إنت عندك مشاكل كثير لازم تحليها . نامي ، و الحوار ده ماحصلش .

عن النصيب

في كلمات بتسببلي نوبات عصبية ، منها كلمة النصيب .

النصيب ، كلمة مفضلة لدى الجميع . أول لما حاجة كان نفسك فيها ماتحصلش ، كل الناس هاتقولك مش نصيبك ، ربنا شايلك الأحسن .. إلى أخره من الردود المعلبة المحفوظة .

الفكرة إن مفهوم طبعا إن كل شئ في هذا العالم قضاء و قدر . و لو كنت من غير المؤمنين بالقضاء و القدر ، الصدفة أكيد هاتبقى لاعب أساسي في حياتك . النصيب هو إسم الدلع للصدفة و القدر و كل الغيبيات التي تدور هذا العالم المكور .

مشكلتي بقى ، إني مش بأفهم يعني إيه الواحد يستنى نصيبه

و ليه الناس بتطلب منك تستنى النصيب في حاجات و تلومك على الإنتظار في حاجات تانية .

مثال ، لو مثلا قررت تستنى نصيبك في وظيفة مرموقة ألف مين يقولك إنك غلطان و لازم تستعد و تدور و تطلب النصح و المساعدة من الأخرين .

لكن لو إشتكيت من إنك حبيت حد و هو قرر يخلع منك هاتلاقي بقى كلام من نوع كله نصيب ، إنت اللي بتسعي ، إصبر و نصيبك هايجيلك .

أولا ، مافيش أي نوع من السعي في إن حد يبدي إعجابه بك و تبادله المشاعر . حقيقة إنك عايز علاقة مش معناها إنك بتسعى ولا إنك " شرقان " على أي حاجة .

ثانيا ، ليه فكرة السعي مرفوضة . ليه زي ما بندور على وظيفة جادة مش من حقنا ندور على علاقة جادة .

ليه أصلا لازم نستنى النصيب .

ليه أصلا فيه حاجة إسمها نصيب ، بيصيب و يخيب .

ليه الدنيا مش بسيطة و كل اللي بيعمل اللي عليه بياخد اللي يستحقه ؟

و ماحدش يقول إن اللي تستحقه أكبر من اللي إنت عايزه و ربنا شايلك نصيبك اللي أحسن بعدين

إحنا حياتنا بتضيع في إنتظار الأحسن اللي متشال عند ربنا بعدين . و ممكن عادي جدا و إنت بتعمل اللي عليك و مستني اللي متحوشلك ربنا يبعتلك مرض كارثي يعذبك كام سنة و تموت .

و وقتها الناس برضه هاتقولك الصبر ، ده تخليص ذنوب و ربنا شايلك الأحسن .

لما إحنا راضيين بالحسن بس .. ليه النصيب دائما أحسن و دائما متشال ؟

كلنا فوزية

سك على بناتك واحدة من كلاسيكيات المسرح المصري . أصبحت من تكرار إذاعتها تلفزيونيًا ركن أساسي من أركان الإحتفال بالأعياد . و أصبح العديد من جمل حوارها محفوظة في أذهان المصريين .  

المسرحية أضحكت أجيال . و لكن بعيدًا عن جرعات الضحك . فالمسرحية فيها عرض عميق لصراع المرأة في المجتمع المصري .

في مسرحية سك على بناتك ثلاث نماذج لثلاث نساء . فوزية و نادية و سوسو .  

تبدأ المسرحية بفوزية بفستان الزفاف ، و يظهر من تحته بوضوح بنطالون بيجامة . فوزية قلقة من تأخر العريس ( حنفي ) لإنهم إتخانقوا قبلها بيوم . و لما سُألت فوزية عن سبب الخناقة أجابت " حاول يمسك إيدي يا بابا "

المسرحية لا تشرح كم من العمر تبلغ فوزية ، لكننا نتوقع إنها في أواسط أو أواخر الثلاثينيات . كانت محجرة ، على حد تعبير ابيها . 

قالت لنا المسرحية بطريقة غير مباشرة أن فوزية عانس  بتعريف مجتمعها ، أو كانت على مشارف العنوسة و أنقذها حنفي . 

فوزية فتاة متوسطة في كل شئ ، عادية إذا جاز التعبير . مثلها مثل كثيرات مثلها . 

تبدأ المسرحية بيوم زفاف فوزية الذي إنتظرته و إنتظره الجميع طويلا . 

 تمثل فوزية بفستانها ، بحنفيها ، بإيديها الناشفة ، بعلاقتها بأبوها و إخواتها الميراث الثقيل للمجتمع المصري الذي على الكثير من الفتيات أن يقاومنه أو يتعايشن معه ، كلٌ على حسب طاقتها .

فوزية فتاة مطيعة ، ملتزمة بالتقاليد و التعليمات . مثلا كانت لابسة بنطالون تحت الفستان ، يمكن لإنها هاتبات برة ، أو ممكن لإن السترة واجبة . تربينا أن البنت لازم تكون مستورة ، و يدلل على ذلك بالحديث ، رحم الله المتسرولات .

فوزية تشعر بالمسئولية ، ليس فقط تجاه إخواتها بعد موت أمهم و لكن تجاه زوج المستقبل . " هأغسل هدمتين حنفي " كانت إجابتها على سؤال هاتعملي إيه النهاردة . 

فوزية إتخانقت مع حنفي لما فكر بعد سبع سنين خطوبة يمسك إيدها .

فوزية إلتزمت بنموذج " الصح " الذي توقعه منها مجتمعها .

توقع المجتمع من فوزية أن تطيع والدها ، فأطاعته

توقع المجتمع  أن ترعى أخواتها ، فرعتهم

و توقع المجتمع أن تصون عفتها و لا تفرط حتى في لمسة يد . و قد كان . و لما حاول حنفي عرضًا أن يمسك يدها لمت عليه الناس

لكن رغم إلتزام فوزية بما توقعه منها الجميع كان إلتزامها هو المصدر الأساسي للسخرية في المسرحية . 

سخرت الأخوات من الأخت المتسرولة القلقة على غسيل شربات العريس في ليلة الزفاف . و ضحك المتفرجون

سخر الأب من إبنته التي إلتزمت تعليماته ، بعدم التفريط و لو بلمسة يد . و ضحك المتفرجون 

سخر العريس منها لاحقا بإدعاء علاقة مع ميرفت أمين . و ضحك المتفرجون

فشل إلتزام " الصح " في حماية فوزية من " غدر " و سخرية مجتمعها . أصبحت بإلتزامها الحيطة المايلة . 

الغدر و السخرية و أن تصبح الحيطة المايلة .  أن تكون " فوزية " هو شبح يطارد الكثير من " بنات " هذا الجزء من العالم .

في داخل كل بنت صراع طرف فيه فوزية .

فوزية ممثلة " الصح " كما تربينا . البنطالون تحت الفستان ، تحمل مسئولية البيت و العائلة ، المحافظة على عدم التفريط و لو حتى في لمسة يد . و يقابل فوزية ، شخصيتنا أو  " الصح " كما إكتشفنا ، إنه مش لازم بنطالون تحت الفستان ، و إن مسئولية البيت و العائلة ممكن أن يتشارك فيها أطراف عدة و أن " كنت سيبيه يمسكها يا فوزية " خيار مقبول و له فوائد مثل " يمكن كانت تطرى في إيده "

المشكلة في الصراع بين " الصح " و " الصح " هو إن الإثنين " صح " .

المشكلة في الصراع إنه مش بين شخصين ، هو صراع داخلي بين شخصيتين . بين تأثير التربية و المجتمع ، و تأثير الخبرات الحياتية .

و لإن االإثنين صح ، و لإن كل شئ نسبي يصبح  الإزدواج ضرورة للتعايش . فالبنطالون مش ضروري ، لكن لازم يتلبس في مناسبات معينة ، أو إرضاء لجمهور معين . 

إن مسئولية البيت يمكن تشاركها ، و لكن إسمًا يجب أن تظل مسئولية الست ، و الست وحدها .

إن لو سبتيه يمسكها يا فوزية ، يجب أن لا يتم هذا أمام شهود ، سيتوقع الجميع أن حنفي سيحاول أن يمسك إيدك ، و سيتوقع الجميع إن إيديك أنشف من إيده و إنه بديهي إنك هاتسيبيهاله يمكن تطرى . لكن لن يريد الجميع معرفة تلك التفصيلة ، سيريدون منك إخفائها و إدعاء إنها لم تحدث أبدا .

سيترك لك المجتمع هامش تحديد مساحة التفريط ، مع نشر كل التحذيرات الممكنة من مغبة الثقة في حنفي ، اللي ممكن بمنتهى البساطة يسيبك لإنك فرطتي في أكثر مما كان يتوقعه .

لإن حنفي جزء أصيل في المجتمع و سبب رئيسي من أسباب الصراع .

تصبح تكلفة الهروب من شبح فوزية هي عدم الإتساق . و التضحية بما نراه صحيحا لفعل ما نراه خطأ ، لإن هذا الخطأ مقبول .

يصبح الرقص على الحبال مهارة واجبة .

و يصبح الشعار " إبقي سيبيه يمسكها يا فوزية " .. بس ما يمسكهاش قوي .

عن ألوان الحب

و في حب من اللي هو أول مرة ده .. اللي بيجي بعد ما تحب كثير و قلبك يتكسر كثير . و فجأة تحس إن عمرك ما حبيت .

بتفرح كأنك عمرك ما دقت فرح و تحزن كأن قلبك هايقف للأبد ...

حب من اللي ماتعرفش بعده إذا كنت عايش ولا ميت ...

حب من اللي هو لحظة ..

لحظة بالعمر كله و بعدها العدم ..

عن العهر

اللوم الحقيقي على العاهرة مش بيع الجسد ... اللوم الحقيقي على العاهرة إنها بتبيع الوهم 

حوارات العالم الموازي - عن المعرفة

في يوم ، في شهر ، في سنة ... على كوكب ما عليه حياة أكثر عقلا ... و عالم لا تحكمه تعقيدات هذا العالم 

كتبت تقول ...

أنا عارفة إنك شايفني . مراقب ألمي و أملي 

عارفة إنه مش فارق معاك ... و عارفة إنك عارف إني بأقول لنفسي إنك بتمثل إنك مش فارق معاك .

عارفة إنك مستني تتفرج عليا و أنا بأمشي ... عارفة إنك ناصب صوان العزاء لكل الحاجات الحلوة اللي جوايا و مستني اليوم اللي هأتقول فيه زيها زي غيرها أنا كنت صح ...

عارفة كل اللي قلته و كل اللي ماجاش على بالك تقوله . و كل اللي ممكن تقوله .

عارفة قدرتك على جرحي و رغبتك في إيذائي .

عارفة إنك عارفني ... 

عارفة إنك عارف أنا هأعمل إيه ...

بس أنا مش عايزة كل ده ...

و عارفة إنك مش فارق معاك أنا عايزة إيه


أنا عايزاك ...

و عارفة إنك عارف ..

أنا عايزاك ... بس!

ألو ... إنتِ فين

أنا كائن بيتوتي . لا أحب الخروج ، لأسباب عديدة . المهم إنه قلما أن أقرر الخروج . و لكن حين أقرر الخروج أواجه سيل من التحقيق . خارجة ليه ؟ مع مين ؟ رايحين فين ؟ و بعد التحقيق الموافقة على طلبي للخروج في المعتاد بتكون مصحوبة بنظرة إمتعاض .

و طبعا زي معظم البنات في مصر ليا ميعاد أكون فيه في البيت . و كمان ليا عدد ساعات متوقعة برة البيت . ماينفعش أخرج من الساعة 8 الصبح و أرجع 10 بالليل .

من إسبوع كده قررت أخرج . و بعد إجابة أسئلة التحقيق و نظرة الإمتعاض و الدوشة و الزن تمكنت أخيرا من مقابلة أصدقائي . و كان وقتًا ممتعا جدا لم يشوبه إلا قلقي في الإستغراق في الإستمتاع بالصحبة الحلوة و التأخر عن العودة  في ميعادي إلى منزلنا العامر .

وفي أثناء إندماجي في الحديث فجأة رن جرس الهاتف ، قرر بابا إنه يكلمني علشان يسألني " إنت فين " . المكالمة كانت قبل الميعاد المتوقع فيه عودتي للمنزل بنصف ساعة . قرر بابا إني إتأخرت . و طبعا كان علي المغادرة . بغض النظر عن إستمتاعي بالصحبة أو إني المفروض لسة في مدة إطلاق سراحي وقت .

في طريق العودة ، قرر أخي مكالمتي . " ألو .. إنت فين " . " أيوة يعني فين " . " راكبة تاكسي ولا حد موصلك " . أسئلة متتابعة . و مكالمة لم تفصلها عن مكالمة بابا سوى عشر دقائق . و كانت هذه المكالمة القشة التي أفسدت أمسيتي .

الفكرة إني كنت مبسوطة . و أنا مش بأخرج . و السرمحة مش طبعي . و مع ذلك قرر بابا و أخويا إنهم يعكننوا عليا اليوم بإصرارهم على " إحراجي " أمام أصدقائي . بيكلموني يسألوني أنا فين و مع مين ليه ؟ ده ناقص يطلبوا يكلموا أصدقائي للتأكد من صحة روايتي .

أنا عندي 34 سنة . و مع ذلك بأستأذن علشان أخرج . و ممكن عادي بابا يرفض الخروج أو يطلب إني أغير المكان . سواء صراحة أو بسلاح منتشر في البيوت المصرية و هو ضرب البوز .

النتيجة إنهم عكننوا عليا فعلا . ضيعوا وقت كنت أفضل تمضيته في أحاديث لطيفة . و كانوا شبح مخيم على أمسيتي من وقت إتفاقي مع أصدقائي . شبح قلق إن بابا مش هايوافق ، شبح قلق إنه هايضرب بوز لأجل غير مسمى لأسباب غير معروفة ، شبح قلق إني أنسى ميعادي . و أخيرًا شبح المكالمات المستفزة ، لإشعاري بالذنب إني فكرت في ترك الكنبة ، الكنبة التي طالما إشتكى أبي إني لازقة فيها مش بأخرج !

في المعتاد البنات بتتخانق . بتتخانق علشان تعمل اللي هي عايزاه . بس أنا مش بأحب أتخانق . مش شايفة أصلا سبب للخناق لإني مش شايفة سبب للخنقة .

الغلاسة من الأهل بسبب القلق . بس السؤال القلق من إيه . كنت في الأول بأقول إنه قلق عادي . بس إكتشفت من الملاحظة إن الغلاسة تتناسب طرديا مع الصحبة اللي أنا قررت أغادر الكنبة لمقابلتها . إن كانت الصحبة معروفة فنسبة الغلاسة أقل و إن كانت الصحبة مجهولة . فالغلاسة بتوصل لأعلى الدرجات و خاصة لو كان الخروج بالليل .

و ده معناه إن الغلاسة لمنعي بالأساس من العط . سواء الغلاسة بقى بتكون مقصودة أو لا إرادية . فأكيد هي بالأساس لمنعي من إرتكاب ما قد يراه أبي خطأ .

و الخطأ يبدأ من إزاي ترجعي متأخر قدام الجيران ، أو إني أكون بأقابل واحد ( خارجة مع راجل لا سمح الله ) . أو إني أتعاطى المخدرات ، مثلاً ؟؟ . عقلي الصغير لا يمكنه تخيل هو إيه اللي بابا بيحاول يحميني منه بالغلاسة و التدقيق في بقابل مين و ليه و فين و بأرجع الساعة كام . هو أكيد عنده أسبابه الوجيهة .

و ده يؤدي لسؤال تاني ، ماذا لو قررت شيماء العط ؟

هو ليه مش من حقي إني أقرر ، و أنا في أرزل العمر ده ، إني أعمل حاجة غلط ؟

طبعا السؤال مجرد كليشيه مقرر . الحكاية هايترد عليها من بنات كثير إني أنا الغلطانة علشان لازم أحارب من أجل الحرية .

السؤال أنا ليه لازم أنتزع ما هو ملكي أصلاً ؟

 أنا بالأساس حرة في تقرير مصيري . قراري أصلا بإحترام قلق والدي نابع من حريتي في تقرير مصيري .

أنا قادرة على الرخامة المضادة . و قادرة على فعل ما يفعله الأخرون من أجل الحرية . و لكني للأمانة شايفة إن الحياة أقصر من الخناق على أنا خارجة مع مين و ماتتأخريش برة . لو ده هايخليه ينام مرتاح أنا هأعمله .

بس مش هي دي النقطة اللي شغلاني . النقطة اللي شغلاني إنه دائما في حد بيحاول يمنع شخص أو اشخاص من إرتكاب الخطأ .

أنا ممكن أفهم الحجر على الأطفال الغير مدركين للعواقب . أو حتى المراهقين الغير مقدرين لحقائق الأمور .

لكن بعد مجموعة خبرات معينة ، لماذا يصر الجميع على فرض رؤيتهم للصح و منع الأخرين من التفكير حتى في إرتكاب ما يرونه خطئًا .

نلاقي مثلا خناق مع الناس اللي مش بتصلي . إنت مالك ؟ واحد قرر إنه مش عايز يصلي تتخانق معاه ليه ؟

و الخناقة أوسع مع فكرة إن في ناس عندها دين تاني أو حتى إختارات تكون بلا دين .

لو سألت حد من اللي بيتخانق علشان الناس تعمل اللي هو شايفه صح هايقولك مثلا إن الناس دي بتضر نفسها و هو عايز يحميها من ده .

إنت بقى بتحميهم ولا بتحمي نفسك ؟

في الأغلب بتحمي نفسك ، جزء لإن الخطأ ممكن يضرك .

مثلا لو قررت شيماء تعاطي المخدرات هذا سيؤثر بالسلب على بابا . و بكده لازم بابا يتأكد إنه عمل اللي عليه من كل النواحي علشان مايجبش لنفسه مشكلة بطريقة غير مباشرة .

أو بتحمي نفسك لإن  لو صديقك فعل الفاحشة ممكن تقلده و إنت مش عايز تمشي السكة دي .

أو بتحمي نفسك لإن الناس اللي مش بتصلي دي ممكن حياتها تبقى كويسة و فرحانة و إنت في قناعتك إن تارك الصلاة آثم و ربنا بيعاقبه . و وجودهم بحياة مريحة فيه تهديد مباشر و غير مباشر لقناعتك دي .

في أسباب كثير تخلينا كلنا نحاول نبقى صح ، و الأهم نحاول ننشر الصح ده .

بس إيه المشكلة في إننا في أثناء محاولتنا إننا ننشر الصح ده نحافظ على حق اللي قدامنا في إنه يعيش زي ما يحب .

يعني مثلا ، ماذا لو قررت لا قدر الله إني أخرج و ماذا لو لا سمح الله رجعت مبسوطة . ليه لازم أثبت لكل الناس إنه لم يحدث ما يمس منظومتهم القيمية في هذا الوقت ؟

أعتقد إن أهم جزء في حياة الإنسان هو حقه الأصيل في إرتكاب الخطأ .

البشرية كلها بُنيت على الخطيئة .

حرية

الفكرة مش إني بآخاف أكون مملة ، الفكرة إن خايفة أكون مش أكثر من تسلية

أنا من حقي أقول من حقي

من حقي أقلق و أسأل أسئلة غبية

و من حقي أخاف

و من حقي إنك ماتزهقش و من حقي إني ما أتهزقش

من حقي إني أقول اللي بأفكر فيه و من حقي إنك تسمعني

و من حقي إنك ماتهربش و ماتزعلش

من حقي رد مطمئن . من حقي نوع من التأكيد إني مملة بس مسلية . إني جد مش هزار .

من حقي إني أشك و من حقي إنك تنفي .

من حقك إنك تسيبني أحبك .

من حقك إني أحبك و مش من حقك تقاوم .

سيبني أحبك ، مش هاتموت ... هنعيش

حكي - 2

أنا فضلت مستنية وقت طويل علشان أحكيلك 

و لما قابلتك مابقتش حاسة إن عمري قبلك فيه أي حاجة تستحق الحكي

مش عارفة أنا خايفة أحكيلك لتمشي ، و لا فعلًا لم يعد في ألامي بعدك ما يستحق الذكر

وحدة

إنت سألتني مرة عن الوحدة . عن الأشياء الغبية اللي قلت إني بأعملها تحت وطأة الوحدة . ضحكت بإستخفاف يومها و قلت إن الحاجات اللي بأعملها مش غبية ولا حاجة لإني ببساطة مش بأعمل حاجة .

ماقدرتش يومها أقولك إنك ممكن تكون حاجة من الحاجات دي ..

ماقدرتش و لسة مش قادرة أحدد إذا كنت إنت مجرد إجابة لضغوط الوحدة أو إني مشدودة لك بجد .

بس اللي أقدر أقرره ، إني أكيد عندي إستعداد أعمل حاجات كثير بس علشان تقربني ليك ... خطوة واحدة للحظة واحدة .

أنا عايزة أقربلك و مش لإني وحيدة ... و مش عايزة يكون القرب ده غباء

أنا عايزاك ... و مش عايزة يكون ده حاجة غبية تؤدي إلى وحدة .

أنا ... عايزاك

بس

تخريفة قديمة

وصلنى إيميل لطيف جداُ واحد بيقول وظائف خالية و الوظيفة المطلوبة هى حاكم عادل للدول العربية . يحكم بالعدل و لا يرضى الظلم و قائمة طويلة
و بما إنى قائدة بالطبيعة زى ما بيقولوا . قلت مافيش أنسب منى للوظيفة دى . بس المشكلة إن أول شرط للوظيفة إن الحاكم يكون عادل و العدل ده صفة مطلقة لا يمكن الوصول إليها ربنا سبحانه و تعالى سمى نفسه العدل، يعنى الله سبحانه و تعالى هو الوحيد القادر على العدل المطلق أما البشر فغير قادرين بأى حال من الأحوال على العدل المطلق أقصى ما بإستطاعتهم هو تحرى العدل قدر الإمكان لأن العدل المطلق يحتاج إلى معرفة مطلقة بكافة الظروف و الملابسات و المعرفة المطلقة غير ممكنة للبشر أحد القضاة الأمركيين كان مكلف بالحكم فى قضية هامة تهم الرأى العام و عندما قابلته إمرأة فى الطريق و دعت له أن يحكم بالعدل و شكرها و قال لها سيدتى إدعى لى أن أحكم بالقانون فليس قادر على العدل غير الله
ما علينا الكلام عن إمكانية تحقيق العدل المطلق بين البشر ممكن يدخلنا فى نقاش سفسطائى مالهوش لزمة ..
نرجع تانى للوظيفة ، حاكم عادل و دى فندناها . الجزء التانى للدول العربية . يعنى من وجه نظرى كمتقدمة للوظيفة إن الوظيفة كده تعريفها واسع شوية . أنا بس كفاية عليا أحكم مصر أما الدول العربية ممكن نأجلها للخطوة اللى بعدها . أنا دايما شايفة أن الواحد يبدأ بنفسه ..
نوصل بقى للسيرة الذاتية بتاعتى ، أنا مش هقول كتير ، أنا مواطنة مثل أى مواطن فيكم لا زايدة مخ و لا ناقصة حاجة عن أى واحد فيكم
نيجى بقى لأهم جزء إيه هو البرنامج بتاعى فى الحكم
أنا مؤمنة بقول شيخنا جمال الدين الأفغانى ، إن مصر فى حاجة إلى ديكتاتور عادل و بما إنى قلت الأول إن العدل نسبى فنتيجة منطقية إنى شايفة إن الحاكم المناسب هو الديكتاتور وأما موضوع العدل ده فكل على حسب طاقته
اكثر القادة اللى بيعجبونى فى التاريخ نابليون بونابرت . يمكن علشان إتولدنا فى نفس الشهر , و معجبة جداً بالحجاج بن يوسف الثقفى ... الراجل ده يا جماعة أسطورة يعنى إن شاء الله لو قررتوا إن أحكمكم توقعوا منى خطبة زى خطبة الحجاج فى أهل العراق .. أنا سأبذل قصارى جهدى طبعاً إنها تكون ببلاغة خطبة الحجاج .
خاصة عندما لخص منهجه .فى الحكم و قال إنى أرى رؤساً قد أينعت و حان قطافها منتهى البلاغة و منتهى الصراحة من الحاكم للمحكوم . و أنا أعد أن ألتزم بمنهج الحجاج ..
أما أسبابى للتقدم لشغل الوظيفة هى إنى شايفة إن الشعب المصرى محتاج لتربية . أكتر من إحتياجه للعدل و الديموقراطية .
و الدليل إنك تمشى فى الشارع تلاقى العيال الصايعة بتعاكس البنات ، و اللى سايقيين بيخبطوا فى بعض و شتائم و مولد و صاحبه غايب . و كل واحد بيرمى أساس المشكلة على اللى جنبه دائماً الأخر هو المسئول أما أنا فمظلوم
تعالوا ناخد جولة فى الجامعات العيال فى طرقات الجامعة أكتر منهم فى قاعات المحاضرات . بيعملوا إيه مش بيعملوا حاجة . هما بس بيقضوا وقت و بيطلعوا رحلات و بيحبوا .. فين الطموح مافيش ، طالب الجامعة ده وظيفته إيه إنه يذاكر بس لأ هما مش بيذاكروا هما بيلعبوا .. و يرجعوا فى الأخر نقول أصل إحنل بلاد متخلفة ..
جولة فى المدارس هنلاقى الحال نفسه . فى المصالح الحكومية حدث ولا حرج إجرائات من إيام الحكم العثمانى ( من وجه نظرى إن الحكم العثمانى كان أحد أهم فترات الظلام فى مصر بس ده هايدخلنا فى نقاش سفسطائى عن التاريخ و ده مش موضوعنا ) و موظفيين مافيش عندهم إهتمام
المشكلة إن بعد ده كله إن الناس دى بتقول إديها كمان حرية . طبعاً أنا مؤمنة إن الحرية دى حق مكتسب للإنسان بالولادة يعنى هى مش فى يدى و لا يد غيرى . كل واحد حر أما قراراتى الديكتاتورية فستكون لتنظيم الحرية فى إطار أنا حر ولكنى لا أضر الأخريين ..
يعنى مافييش مظاهرات ، العيال الصايعة اللى بتعمل شغب دى أنا هاعلقها على أبواب الجامعة و على الكبارى . اللى عايز يعمل مظاهرة يبقى من غير شغب و المظاهرة تكون ضد سياساتى التعسفية و أحكامى القمعية أما بقى إن دولة تانية يحصل فيها حاجة يعملولى أنا مظاهرة هنا ده مرفوض رووح ذاكر يا فاشل و سييب إيد البنت اللى جنبك و بلاش شغل أفلام عربى .
بالنسبة للقضية الفلسطينية فأنا منهجى هو "و سارعوا إلى مغفرة من ربكم و جنة عرضها السموات و الأرض" و اللى مش فاهم ، أنا أقصد اللى شايف نفسه قادر على أنه يحرر فلسطين دلوقتى يتفضل يروح و ما يوجعليش نفوخى أنا و باقى الإخوة سنعد لهم ما إستطعنا من قوة . لإن سياستى هى الأفعال لا الأقوال .. لكن بقى الطنطنة بإن إحنا نعلن الحرب و كل واحد بيقول كده و هو بيشد فى نفس الشيشة و لا بيتفرج على الدش ولا كلمتين يسخنوه و بعدين يرجع يعمل اللى كان بيعمله ده ماينفعش . لإنى لاحظت إن معظم المطالبين بالحرب مطالبيين متحمسيين فى الخطب الرنانة مش بالفعل و اللى عايز يعمل حاجة يتفضل يقرأ الفقرة من الأول
أنا طالبة 3 شهور فقط أحكم فيها البلد بالحديد و النار أوعدكم إنى سأسحل كل واحد مش هايلتزم بالقانون اللى أنا هاعمله . أوعدكم إن اللى هايستغل نفوذه هانفيه فى الصحراء . الطالب اللى مش هايذاكر هاعلقه على باب جامعته . سأعيد عقوبة الجرسة من جديد . هاحلق للشباب الصايع رأسه و و أدهنها عسل و أمشيه على حمار بالمقلوب . و اللى مش هاينفع معاه ده ينفع معاه السحل و التعليق
منهجى هايكون إنى أرى رؤوساً قد أينعت و أعدكم بأنى سأقطفها .
توقعاتى إذا نجح برنامجى فى الحكم إنى أغتال . لو إتحرك الشعب ده و إغتالنى أبقى نجحت فى تربيته و يبقى الشعب نضج و يقدر يحكم نفسه بنفسه . لكن لو فضل محلك سر كالعادة يبقى شعب يستاهل السحل . و يبقى الأمل فى إن إحنا نفنيه و نجيب غيره علشان ورانا مهام جسام نعملها .. ( لما بقول نفنى الشعب أكيد أنا كمان معاه لتقولوا هى فاكرة نفسها حاجة غيرنا ولا إيه . أنا هاكون أول واحدة يتنفذ عليها القانون )
أنا أكيد مش هاعمل أى حاجة مما سبق لتأمين حكمى ، أنا هأعمل كل حاجة لتربية الشعب المصرى على النظام .
طبعاً أنا سأحتاج لطقم من المساعدين ، و دى وظائف شاغرة للى يحب يتقدم . شرطى الوحيد الولاء للبلد دى . مطلوب رئيس وزارة و وزراء بس أهم وزير هيكون وزير السحل اللى هيكون ضمن مسؤلياته تنفيذ القانون و ضرب المربوط و السايب . شرط آخر يجب توافره فى الطقم المعاون إنهم يكونوا عارفين إن نتيجة نجاحهم هى قتلهم و التخلص منهم و يجب أن يقسموا ألا يحاولوا حماية أنفسهم من الشعب لما يفوق .
ما رأيكم دام فضلكم ؟ ميين فيكم شايفنى مناسبة للوظيفة ؟ ولا أحسن نكمل الديكتاتوريه و أقفز إلى سدة الحكم عنوة ؟ أنا ديموقراطية إلى أبعد الحدود ..
مستنية طلبات التقدم للوظائف المختلفة فى إدارتى الجديدة
الرئيسة الجديدة للدولة المصرية ( أصل أكيد مش هتكون جمهورية لازم نخترع إسم جديد ولا هما اللى عملوا الجمهورية أحسن مننا فى حاجة ؟!! )

تبقى الكلاب تعوى و القافلة تسير

من فترة كده طلعت نكتة لطيفة قوى . قال إيه سيادة الرئيس حب يرفع شعبيته فإتفق مع الدكتور نظيف إنه يطلع قرار من قراراته التعسفية قوم الشعب يزعل فيتدخل الريس و يحلها فالشعب يحبه ( عادى جدَا ) . فالسيد نظيف قرر إنه يفرض ضريبة على الكبارى ، كل اللى يطلع يدفع . الشعب دفع و هو ساكت . راح قال كل اللى يطلع يدفع و اللى ينزل يدفع . برضوا دفعوا و هما ساكتين . فطبعًا زهق و قال الحل إن كل اللى يطلع يدفع و يضرب على قفاه . و برضوا لا حس و لا خبر . راح السيد الرئيس نزل بنفسه يشوف الشعب ماله . لقى واحد متزرزر و متضايق ، فحمد ربنا إن الشعب لسه بخير و عنده دم . فراح يسأله إيه مضايقه . المواطن المصرى الصالح جاوب بمنتهى الغضب "ما هو مش معقول كده ورانا أشغال ، المفروض يزودوا الناس اللى بتضربنا على قفانا" .
طبعًا أنا مش بعرف أقول نكت بس هى المفروض نكتة تفطس من الضحك . و لأ يا أشرار مش علشان بتقول الريس نزل بنفسه و لكن لأنه مع الأسف و الألم الشعب المصرى بيتزرزر مش علشان يوقف الضرب على القفا و لكن علشان ينظموا عملية الضرب .
مش هاقول تاريخيًا الشعب المصرى بياخد على قفاه لإنى مؤخرًا إكتشفت إن كتب التاريخ بتاعة المدرسة أغفلت الكثير من تململ الشعب المصرى الصبور على الرغم من إن هذه التململات كانت فى أفضل صورها على مر العصور لا تزيد عن ما وصفه السادات بإنه إنتفاضة حرامية . فتاريخيًا الشعب المصرى كان بيضرب على قفاه بس كان بيعترض و كانت إعتراضاته الموسمية دى شبه مؤثرة زى إنتفاضة الحرامية بالضبط .
طيب السؤال ، ليه دلوقتى التململ بقى مش إعتراضًا على الضرب على القفا و بقى شكوى لتنظيم الضرب . ليه المصايب نازلة ترخ على البلد من كل حدب و صوب و لا تقابل هذه المصايب بأى رد فعل من الشعب المصرى إلا اللعن و الشيمة و الدعاء على البلد . ليه الشعار الوطنى بقى إيكش تولع و ليه لما ولعت بجد ( فى حريق الشورى ) الناس هللت زى ما يكون اللى إتحرق كامب من كامبات الإنجليز .
المصريين بقوا مقسومين نصين ، نص بيهلل للولعة و النص التانى متفائل إنه هايعرف يطفى الحريقة لو نفخ فيها . و اللى يغيظ إن النص اللى بيهلل للولعة أغلبه هرب من السفينة الغارقانة و بيهلل من على شواطئ الخليج و أوروبا و أمريكا . بيطالب بهد مكان هو مش فيه على دماغ اللى فيه بدعوى إنه لازم يتبنى على نضافة . طيب لما يتهد مين يبنيه لما الفران هربت . مش لوم للفران لإن الطوفان بياطل الكل و حقهم يهربوا بس يا ترى هل من حقهم يطالبوا اللى بيكافحوا الغرق إنهم يولعوا السفينة مادام بتغرق و لو حد نجى يبقى يفكر يبنى سفينة من أول و جديد .
و النص المتفائل كل واحد فيه واقف ينفخ فى قربه مقطوعة على أمل إنه لو إبتدى بنفسه يمكن يغير مسار الدنيا و يصبح فى يوم يلاقى الشمس تشرق من الشمال .
لا نيرون اللى واقف يرقص بيطلب ولاعة يساهم بيها فى حريق مصر من أجل مستقبل أفضل صح ( خصوصًا لو كان مأمن جنسية تانية و عيشة بلهنية و عايز يغير مصر علشان ميضايقش منها فى إسبوع الأجازة ) و لا اللى سل سيفه يحارب طواحين الهوا صح . لإن فى الحالتين كله كلام . لا اللى عايزها تولع ولعها و إن ولعها لا يمكن يبنبها و لا اللى بدأ بنفسه على أمل إن فى صلاح الفرد صلاح للمجموع هايصلح أى حاجة أكبر من مليمتر مربع فى دماغه .
هايفضل المصريين يبعبعوا و يزعقوا و إن نجحوا و ثاروا مرة كل كام قرن مش هاتزيد ثورتهم عن إنتفاضة الحرامية .
الحل يا سادة مش فى إننا نولعها بحلوها و شرها و الحل مش إنى أغير نفسى من غير ما أغير غيرى . الحل فى إننا نتغير كمجموع . الحل فى إن اللى مش عاجبه الكيانات الفاسدة يخلق كيانات مضادة . كيانات شرعية ، تغير من غير ما تهدم كل حاجة . كيانات ذات فعالية . من غير ما كل واحد يقول خلينى جنب الحيط و اللى حصل لفلان و لعلان .
لإن و مع إحترامى للكل كلنا كلاب تعوى و القافلة ماشية فى سكتها و داخلة فى الحيطة . من كارثة لكارثة و من سئ لأسوأ إلى أن تصل إلى أسفل سافلين .

وقفة مصيرية

الحكومة الرشيدة قررت بدء حملة للسيطرة على الزيادة السكانية . مع إن لو الحكومة صبرت الناس هتموت من الجوع لوحدها و لكن نقول إيه ، خلق الإنسان عجولا و بإعتبار السادة الوزارء و القائمين على الهيئات التنفيذية و التشريعية من بنى الإنسان فهما مش عارفين يصبروا مع إن الصبر جميل .
المهم ، خير اللهم إجعله خير قال الشعب المصرى لسه بيزيد . تقريباً برضوا الحكومة ماتعلمش إن الشعب المصرى بطل جواز و اللى بيتجوزوا بطلوا خلفة أو قاطعين الخلف و الحمد لله .
فاعيزين اللى لسه له شوق للخلفه مايعملهاش . فعملوا حملة ذات عنوان لطيف . "وقفة مصرية " علشان نتعلم كلنا و نشبع كلنا و نتعالج كلنا و نستريح كلنا و نشرب كلنا و نشتغل كلنا .
قبل ما نزيد مولود نتأكد إن حقه علينا موجود .

اللهم أخزيك يا شوشو . الحكومة دى أنا بقول عليها غبية من زمان . بس دلوقتى بس إتأكدت . إن الغباء كلمة بسيطة . هو السادة القائمين على الحملة محدش جه فى دماغه إن خير اللهم أجعله خير فرضنا الكلام ده جه على هوى أشخاص معينة و قرروا يقفوا وقفة مصرية مصيرية علشان ناكل كلنا و نتعلم كلنا و نستريح كلنا و نتعالج كلنا . بس قرروا يعملوا الحاجات دى بالطريقة الصح مش إنهم يبطلوا خلف لأ يقطعوا دابر اللى قطعوا خلفهم . الحكومة ساعتها تعمل إيه .

سكتنا على مصر اللى بتتقدم بينا و على الشباب اللى بيحب مصر و طلع باقى المصريين ولاد ستين فى سبعين بيكرهوا أم البلد دى . دلوقتى لازم نقف وقفة مصرية .

أنا مش فاهمة الحكومة دى هاتفضل تلون علينا لحد إمتى ؟

أنا كمواطنة مصرية صالحة أطالب الحكومة بوقف تداول شعار الحملة و محاكمة القريحة اللى طلعت بيه بتهمة محاولة قلب نظام الحكم . أنا لو بحكم البلد دى هاعمل كده . بس أنا نسيت ، أنا لو بحكم البلدى هاعمل كده علشان عايشة فى مصر اللى الناس هاتفهم فيها الوقفة على إنها وقف الحال المايل مش وقف الخلف لكن الحكومة اللى رافعة الشعار ده عايشة فى مصر تانية .

يا حكومة ، ماذا لو حكم الشعب المصرى عقله ؟؟

حكموا عقلكم مرة و إرحموا من فى الأرض يرحمكم من فى السماء