رسائل إلى آرثر - 5

العزيز آرثر

تنتابني نوبات غريبة من ضيق الصدر. كأن قلبي يصرخ في سجنه. يتألم ويصبح حتى النفس مستحيل. أشعر بخدر يتسلل في جسدي.

ألم .. ألم لا ينتهي

يصرخ عقلي مذعورًا "أنا عايزة حضن".

أبحث عنه ولا أجده .. لا أجدك .. لا أجد بديلًا

عارف الحضن؟

حين تطوقني بحبك قبل ذراعيك. حين يتوقف قلبينا للحظة ليعودا للنبض في إتساق. حين تهدأ أنفاسي وتعود الحياة لأطرافي.

يضيق صدري .. ولا أجدك

أنا عايزة حضن!

رسائل إلى آرثر - 4

إنت عارف أنا إيه أكثر حاجة مزعلاني ؟

لا مش إني لسة بعافر علشان أنساك . و لا إني لحد دلوقتي و مع كل الأشياء الغبية اللي عملتها لسة مشاعري تجاهك زي ما هي ، " حلوة " .  

و لا زعلانة من غبائي .. و إستمراره .

ولا زعلانة من تذللي لك علك ترضى مرارا .

في حاجات كثير لازم تخليني أزعل .. أزعل إني محتاجة لك  مثلا أو أزعل كل لما توحشني. 

في حاجات كثير قوي ، لكن أكثر حاجة مزعلاني هي إكتشافي إن واحدة من أصدق رسائلي لك كانت رسالة غضب .

زعلانة إن كل الشر اللي كان مكتوب كان من القلب .  

و زعلانة أكثر إن مافيش فرصة للندم .. في كل يوم بتثبتلي إن الشر ده كان في محله . و إنك تستحقه تماما .

المهم ، مش هطول عليك . أنا بس عايزاك تفتكر . مش معنى إني غلطانة إنك إنت مش إبن كلب . 

المحبة إلى حين 

رسائل إلى آرثر - 3

عزيزي آرثر 

أريد أن أكتب لك اليوم عن الفقد . أريد أن أحدثك عن الإشتياق . و لكن كيف لي أن أتجنب التفاصيل ؟ ما الفقد و الإشتياق إلا تفاصيل . و التفاصيل كما تعلم ثقيلة ، مملة .

عزيزي آرثر ، أفتقدك

عزيزي آرثر و دون الدخول فى التفاصيل ، أشتاق إليك

أرجو أن تصلك رسائلي يومًا ما و أن تجدك فى خير حال 

المنتظرة إلى حين

رسائل إلى آرثر - 2

عزيزي آرثر ،

قلت لي فيما قلت أنني يجب أن أتغلب على مخاوفي . أن أتجاوز تلك الأفكار ، أو العقد الصغيرة .

كيف أتغلب عليها فى الوقت الذى تثبت فيه أنها كلها حقيقية ؟

حبيبتك الحائرة إلى حين 

رسائل إلى آرثر - 1

عزيزى آرثر ،

عارف أنا نفسى فى إيه ؟ نفسى أكلمك  و نفسى أشوفك

و نفسى تحضنى

و نفسى أعيط مش علشان خايفة منك ، نفسى أعيط و أشكيلك من الدنيا .

نفسى أقولك الحاجات اللى مش بأقولها لحد

نفسى أقولك الحاجات اللى إنت بتخلينى أفكر فيها

نفسى تبوسنى

نفسى تحط إيدك على قلبى 

نفسى أسمعك بتقول بأحبك 

نفسى أبوسك و ما أكنش خايفة 

لا منك و لا من حد تانى

نفسى قوى أعيش ألف حياة كلها فيك 

إمضاء

المحبة إلى أن يشاء القدر