Showing posts with label ملاحظات عابرة. Show all posts
Showing posts with label ملاحظات عابرة. Show all posts

Sunday, October 2, 2016

الفراغ


مش الفوضى اللي خلاقة، الفراغ خلاق. حتى الفوضى ليست إلا مخلوق من مخلوقات الفراغ.

كلنا (كل شئ فينا) - كل شيء - أبناء "الفراغ". 



Saturday, June 18, 2016

غلطة!


الفراق صعب! لكن أحيانا الفراق بيكون ضرورة. ولإنه صعب، دائما بيتأجل. الفراق في أغلب الأحيان بيتساب للوقت. بنصبر ونتأقلم مع أوضاع لولا صعوبة الفراق ماكناش صبرنا وتأقلمنا معاها.

أحيانا بقى بيبقى في طرف أكثر قدرة على أخذ قرار الفراق. الحقيقة اللي بيطمسها قسوة القرار وألام الفراق إن القرار ده هو القرار الصح. 

الفراق بيصلح غلطة اللقاء.

لما سابك هو عمل الصح اللي ماكنتيش قادرة تعمليه علشان بتحبيه.

الفرقة صعبة صحيح، لكن ماتنسيش هو عمل الصح. 

Saturday, June 11, 2016

أتب!




في خبر مستفز أبرزه أولًا موقع "ذا مونيتور" أدرجت لجنة الأمن القومي بالبرلمان المصري "مشكلة العنوسة" على قائمة القضايا التي تمس "الأمن القومي". 

وبعيدًا عن أسباب الإستفزاز في الخبر، وقبل أن تقترح اللجنة حلولًا - سواء من داخل الصندوق أو خارجه - على اللجنة أولًا إستيعاب حقيقة "مُرة" عن علاقات النساء بالرجال في هذا الجزء من العالم في هذه اللحظة من عمر الزمن.

العلاقات العاطفية  بكل أشكالها - أصبحت نوع من "الأتب"! 

إزاي أتب؟ 

ولإجابة السؤال يجب علينا أولًا إجابة سؤال لماذا نرتبط عاطفيًا؟ 

والإجابة سهلة وبسيطة ومعروفة وبديهية. نرتبط عاطفيًا من أجل "الشهيصة"!

يعني إيه شهيصة؟ 

يعني إشباع حاجات عاطفية وجسدية وتحقيق حالة من التوازن النفسي بوجود شريك لرحلة الحياة بحلوها ومرها.

إيه علاقة الأتب بالشهيصة؟

الأتب يظهر لما تندعم الشهيصة. 

في قصة مكررة، يتقرب رجل من إمرأة فتتعشم فيه خيرًا، يقدم السبت فترد بباقي أيام الأسبوع. وما أن يحدث هذا حتى "يسوق العوج". تتحول العلاقة لفاصل من الفصال من أجل الوصال حتى تنتهي.  ثم تتكرر القصة. وبتكرارها تفقد حتى مرحلة "المطاردة" بهائها. 

مع كل كلمة إعجاب تبدأ المرأة في شيل الهم. يا ترى المرة دي زي اللي قبله ولا لأ. ومع كل خطوة في العلاقة تتوقع الإحباط. وتوقع الإحباط إحباط في حد ذاته. والأهم إن تحول الرجل والعلاقة لأتب في حياة المرأة غير مربوط بتعريف. هو هيبقى أتب في كل الأحوال.

سواء تزوجته وقرر بعد الزواج إنه زهقان وملان من المسؤولية ومن حقه الترويح عن نفسه. وإنه أوك يسخف منها وينكد عليها وبعدين يقول عليها هي نكدية. أو سواء توقفت علاقتهم عند الولا حاجة. فحتى الولا حاجة عبء .. 

وتصبح حياة المرأة بلا هذا العبء عين العقل. 

تجيب لنفسها وجع الدماغ ليه؟ لما كل مرة بتقرر تجرب بتوصل لنفس النتيجة. والأهم إنها مش بتشوف حواليها أمثلة جربت ولقت حاجة غير وجع الدماغ.


مع خالص تمنياتي للجنة الأمن القومي بالبرلمان بالنجاح :) 

ملحوظة: الكلام ينطبق على الرجالة والستات. علشان وحيد زمانه اللي هيقولي الستات بتعمل اكثر من كده. 


Sunday, February 21, 2016

في تعريف الوحدة




في نكتة قديمة، عن واحد بيدور على ركن في أوضة مدورة.

الوحدة هي إنك تكون الشخص ده. بتدور بمثابرة عن ركن في أوضة مدورة. إنت عارف إنه ليس للدوائر زوايا وبالتالي ليس هناك أركان في الغرفة الملعونة. ولكنك بتلف، بتلف، بتلف، بتلف .. 

الدائرة عمرها ما هتنقسم لمثلثات بزوايا مختلفة. الأوضة المدورة عمر ما هيطلع فيها ركن. ولكنك بتلف .. بتلف .. بتلف 





Tuesday, January 26, 2016

ثورة الكوندوم



لو كنت من سكان شبكات التواصل الإجتماعي المصري فأكيد مر عليك فيديو الكوندوم أو تعليق عليه سواء سلبي أو إيجابي. لو كنت من القادمين من خارج الكوكب أحب أقولك في إيجاز حدوتة الكوندوم.

أولًا وقبل البدء في قص الحدوتة يجب التوضيح إن كوندوم يعني واقي ذكري لإن تبين من ردود الفعل إن بعض الناس مش عارفة ايه ده أصلا.

الحكاية تبدأ من خمس سنين فاتوا – والله حاولت وإنتم اللي مصرين – لما قرر جزء من الشباب المصري "الثورة" من أجل "الحرية". 

يعني إيه "حرية"؟

ماحدش في اللي ثاروا من أجلها قال لنا وقتها ولا يمكننا إستنتاج مفهومهم عن الحرية من تصرفاتهم، لإنهم مثلًا دعموا مرشح جماعة دينية فاشية للرئاسة وده ضد بديهيات "الحرية".
الحاجة الوحيدة اللي الشباب الذي ثار من أجل الحرية متسق فيها هي رفضه المستمر لأي شكل من أشكال السلطة. الحرية عند أغلبهم أقرب لمفهوم طفل عنده ثلاث سنين عن الحرية، إنه يعارض ماما وبابا ويعمل "الغلط" علشان هو "حر". 

وده يرجعنا لفيديو الكوندوم. حيث قام شباب زي الفل بنفخ مجموعة من الكوندومز على شكل بالونة وتقديمها لعساكر الشرطة إحتفالًا ب 25 يناير.
الشابان دول عملوا حفلة عيد ميلاد لمجيدة – اللي هي الثورة - عبروا عن حراك يناير بعفوية شديدة وبعمق وبشجاعة.

هم راحوا للسلطة ليسخروا منها لتقويضها ولو رمزًا. ونجحوا في ده جدًا والدليل على كده إعجاب أغلب "معسكرهم" بالشغل العالي ده. ومن ثم إنتشار الشغل العالي ده ووصوله للمواطن المصري العظيم. نفس ذات المواطن اللي وصله حراك يناير 2011.

وقد تصرف المواطن المصري العظيم بذات العظمة التي تصرف فيها مع حراك يناير 2011 .. سحقه بذات آلياته.

عايز صناديق؟ خد صناديق.
عايز لايك وشير؟ خد لايك وشير
عايز تعمل حفلة على السلطة؟ إتفضل معانا نطفي الشمع

الفكرة التي لم يفهمها الشباب الثائر في يناير 2011 ولا الشباب المفزوع من رد الفعل على فيديو أهبل. إنهم هم ذاتهم جزء من السلطة اللي بيقولوا انهم لا يخضعوا لها.

مش مصدقين؟

لما قرر الشاب الحليوة المحبط من حال البلد، السخرية من السلطة استخدم "الواقي الذكري" ودلالته الجنسية النابعة من أفكار المجتمع التي تشكل السلطة لإهانة السلطة. ولما حبوا يزودوا يعني في الإهانة كتبت إحداهن جبنا الواقي هاتوا الفازلين. (وهي جملة إحتاجت مني لسؤال جوجل علشان أفهم هي تقصد إيه وبالمناسبة حد يقولها إن الفازلين غلط لازم تستخدم حاجة اساسها مائي لا تتفاعل مع اللاتكس) إكتشفت إنهم هي وهم والمهيصين للكوندوم رمز الحرية في بحثهم عن الحرية من السلطة هم غاضعين لها ولقواعدها. 

مش أكثر من طفل لا يزيد عمره على الأربع سنوات، بيدبدب في الأرض وعايز يعمل حاجة ماما وبابا قالوله لا عليها. عايز يعملها ليه؟ علشان هو "حر".

مش إنت حر؟ 

بتعيط ليه؟


Wednesday, September 23, 2015

Wednesday, September 2, 2015

فوزية كمان مرة

بنت متوسطة الجمال،  محجبة، تشغل وظيفة "عادية" في شركة "متوسطة" ومن اسرة متوسطة. متعلمة تعليم "عادي". وطموحها انها تعيش مبسوطة. والإنبساط عندها "عادي"، يعني حياة من غير مشاكل، ومرتب يكفل الاحتياجات والستر والصحة وراجل يحبها وتحبه وبيت يجمعهم وعيل او اثنين يتسندوا عليهم.
بنت متوسطة في كل شيء، قنوعة، مش متطلبة، بتاخد خطوات علشان ترضي اللي بتحبهم. البنت دي ايه يخلي اي راجل يفكر فيها كحبيبة او زوجة؟
الراجل عايز الجميلة، ذات القوام الفتان. صاحبة الوظيفة المرموقة في الشركة المرموقة. اللي علشان يبسطها لازم يدفع كثير  ويفكر اكثر. اللي احتياجاتها اكبر من الستر والصحة وراجل تحبها وتحبه.
الراجل عايز النمرودة اللي تلاعبه .. الراجل عايز وردة يعلقها في الجاكت وفوزية مش وردة فوزية عود برسيم، بس للأسف ماحدش هيقول الحقيقة دي.

فوزية مالهاش فرص "تنبسط" رغم ان طلباتها في الانبساط مش كثير. واخرة فوزية بعد الصبر حنفي نمرود .. يمن عليها بإنه قبلها رغم انها متوسطة وهو يستحق حاجة احسن من كده.

Friday, October 31, 2014

سين من الناس

القصة تقليدية جدا ومكررة. تظن أحيانا إن التكرار يعلم الشطار أو حتى الحمار. لكن بعض الظن إثم. ويموت المعلم دون أن يتعلم.
هي علاقة على هامش التابو. رجل متزوج ويعول وفتاة تحاول اللحاق بقطار الحياة.
يبحث عن تجديد لحياته الرتيبة. يبحث عن إثبات لإستمرار شبابه قبل شبح الأربعين. يبحث عن "متعة".
أما هي فتبحث عن معنى لحياتها المليئة بالكثير جدا من اللاشئ. تبحث عن الحب والتقدير والأمان.
هذا النوع من العلاقات رغم إنه يوعد بالكثير من "العائد على الإستثمار" إلا إنه إستثمار خاسر وقصير العمر.
فالباحث عن المتعة لن يوفر أبدا الأمان ولا التقدير ولا الحب. المتعة إستثمار قصير الأجل. يجد إشباعه في كلمتين حلوين أو خروجة لطيفة أو قبلة مخطوفة تذكره بأيام الشقاوة.
الحب والتقدير والأمان استثمارات طويلة الأجل. تحتاج مجهود وعمل ومثابرة.
هو بسيط .. شخص بسيط في مطالبه واحتياجاته وتفكيره وتعامله مع العلاقة. ظروفه تجعله بسيط.
هي معقدة .. مطالبها مشروعة لكنها بعيدة المنال. ظروفها تجعلها معقدة.

علاقتهم ولدت لتموت .. ده لو اعتبرنا انها ولدت أصلا!

Thursday, September 11, 2014

قصة صديقين



الإثنان من أعز أصدقائي. كل واحد له غلاوة ومكانة لا يعوضها غيره.
الإثنان حائط دفاعي الأول ضد الحياة وفي نفس الوقت حائط دفاعي الأخير.
لكن في فرق زمني في المعرفة، 6 سنين تفصل تقريبا بين تاريخ تعرفي على الصديق الأول والصديق الثاني.
لكن رغم انهم الإثنين أقرب ما يكون ليا. والإثنين يعرفوا عني كل حاجة.
لكن يبدو أحيانا لي ان الاثنين قابلوا شخصيتين مختلفتين.
الأول مثلا كان يلوم عليا "طموحي" الزائد. أما الثاني فيلوم عليا قلة الطموح.
أنا هو أنا .. لكن المهم العين اللي بتشوف.


Tuesday, August 12, 2014

لا داعي للدهشة


مافيش أخبار من فلان؟

السؤال ده بيتكرر مع كل مشروع فاشل. لما فلان بعد أن يمطرني( ويمطرك عزيزتي القارئة) بالكلام المعسول ووعود الحب، يقرر فجأة أحيانًا ومش فجأة قوي أحيانًا أخر إنه يختفي.

تنقطع أخباره، تتبخر وعوده .. يقنعك الأمل إنه سيعود. أكيد هيصالحني .. مش هأهون عليه .. هو بيحبني .. 

لكن أملك كاذب .. مش هيصالحك .. مش هيحايلك. لن يعود! واه .. طبعًا مش بيحبك.


لا داعي للدهشة .. فلان إنقطعت أخباره. ده العادي والمتوقع. العيب في الأمل مش في فلان.


Friday, May 16, 2014

النبوة أم الأبلسة؟



لو فرضنا إن في نمطين لنشر الأفكار، نمط "النبوة" وهو واحد بفكرة ملتزم بها وبينشرها بإسمه وأتباع الفكرة مدينين له بالولاء .. إلخ. 

ونمط "إبليس" و فيه الفكرة مشاع، بالعكس كمان ممكن حد غير صاحبها يدعي إنها فكرته وينشرها على طريقة "النبوة". 

إنت تحب تبقى إيه؟ صاحب فكرة منتشرة بغض النظر عن صك الملكية و علاقة التابع والمتبع. ولا "النبوة" من طباع البشر؟ 


Sunday, May 11, 2014

حجابي .. حصني!


إنت محجبة ليه؟

الموضة زمان قبل ما أتحجب كانت سؤال "إنت مش محجبة ليه؟" . مع هجوم الحجاب في التسعينات كنت أنا تقريبًا الوحيدة اللي مش محجبة في أصحابي. وكنت عندي دائمًا ردود جاهزة للي بيسأل السؤال ده. ردود تتنوع من الرد المنطقي للناس المحترمة للرد السخيف للناس السخيفة.

لكن في يوم قررت ألبس الحجاب. 

إيه اللي غير رأيي؟

كنت في مكان مليان ذكور، وعلى الرغم من لبسي "المحتشم" إكتشفت إنهم مش عارفين يركزوا في الكلام اللي بأقوله. واحد مركز في جزء من الذراع لإني كنت لابسة نص كم. وواحد كان مركز في شعري اللي ملموم كحكة. وفي واحد كان مهتم جدًا بمنطقة الرقبة وبداية فتحة القميص.

الموقف ده تكرر مع مجموعات أخرى من "الذكور". الشئ اللي كان صادم جدًا وقتها. لإني من "بيئة" مافيش حد فيها بيبحلق. وكمية "الجلد" الظاهر مني لم تكن أبدًا عائق إن الناس تركز في الكلام مش في اللي بيقوله.

كان قرار الحجاب بديهي جدًا. لإني لقيت إن الطريقة الوحيدة اللي أكون فيها "مساوية" للرجل هي إني أغطي نفسي. علشان أبقى عقل مادام الرجل ده مش شايف فيا غير جسد.

أنا ليه لسة محجبة؟ لإن أسباب لبسي للحجاب ما إختفتش. أنا بني أدم له عقل وأفكار. ويهمني أفضل بني أدم له عقل وأفكار.


ولحد ما "الذكور" يقرروا يتجاوزوا "الجسد" .. الحجاب هيفضل موجود.


مع خالص التحية لكل الناس اللي مش فاهمة أنا لابسة الحجاب ليه ومشتبكة في حوار حول جسد مذيعة سكاي نيوز :)



الأساطير المؤسسة لجماعة القلب المكسور







تقول الأسطورة أن المرأة "تطفش" الرجل. الرجالة عندها قائمة من الأسباب السابقة التجهيز اللي بيرصوها على هيئة قصيدة في ذم النساء.

زنانة، مرهقة بإهتمامها بالتفاصيل، عايزة تعريف للعلاقة بدل إهتمامها بإستمرار العلاقة، مهملة، مش مهتمة بيا ... إلخ

لكن الحقيقة، إن الرجل بيقابل في حياته نموذج للست اللي مش زنانة. اللي بتتناسى تعريف العلاقة لإرضائه، اللي بتهتم بمزاجه على حساب أي شئ أخر.

مصير الست دي هو كسر القلب. ليه؟ لإنها مازنتش والمفروض تزن لتحصل على "حقها". وحقها هو "تعريف" للعلاقة اللي "البيه" مالوش مزاج يعرفها.


تقول الأسطورة إن الست بتطفش الراجل. لكن ثبت في الأثر، إن القط يحب خناقه!





Wednesday, May 7, 2014

مش كفاية




لما البني أدم بيحب حد، قربه بيكون أهم مطلب عنه. تبدأ مشاكلك مع المحبوب لما المحبوب يقرر إنه يتحكم في مسافة القرب.

بغض النظر عن الأسباب، بيمسك المحبوب الأستك و يقربك ويبعدك.

ودائما دائما القرب والبعد مش في الوقت اللي انت محتاجه ولا بالطريقة اللي تشفي هواك.

لما البني أدم بيحب حد بيكون عايز يقرب منه.


بس خلاص ..ده السؤال والإجابة!

Thursday, April 24, 2014

النفيستان


نفيسة ١: 

زوجة حنفي في مسرحية المتزوجون. فتاة تلخصت أحلامها في الزواج من حنفي. بسيطة المنشأ. غير مثقفة. تحب زوجها بطريقتها وطريقتها هي: أقصر طريق إلي قلب جوزك معدته. وماتعرفش فضيحة وترجيت. 

على الرغم من تفانيها في إسعاد زوجها بكل ما تملك من "معارف" إلا إنها تفشل ولا تستطيع إجتذابه إلا بعد أن ترتدي قناع "فاني' المرأة القشرة . تلمع من الخارج و خاوية من الداخل . 

نفيسة ٢:

زوجة ميزو في مسلسل يوميات ميزو.  غنية. ذكية. متفانية في دراستها وعملها. تحاول إسعاد ميزو بكل ما أؤتيت من "معارف".
تفشل نفيسة في إجتذاب ميزو. حتى تتدخل عمة ميزو و تغير من مظهر وطريقة كلام نفيسة. 
يقع ميزو في غرام المرأة "القشرة" 


تزوج كل من حنفي و ميزو نفسيته من أجل "المصلحة" ومع ذلك لم يجدا أي غضاضة في التقليل من شأن المرأة التي لولاها لما تمت المصلحة.
واجه كل من حنفي و ميزو محاولات النفيستان لإسعادهما بالجحود


لم يتقبل الزوجان النفيستان إلا بعد تحولت كل منهن إلي دمية خاوية. 



وهذا يفسر كل الأشياء! 

Thursday, April 17, 2014

في السياسة و الصداقة


في نكتة مستوردة عن زوج و زوجة قررا أن يلعبا لعبة لإختبار متانة علاقتهم بأصدقائهم . التحدي كان مكالمة عشرة أصدقاء و إدعاء إن أحد الأزواج مختفي و سؤال الصديق " هو / هي فين " .

بدأ الزوج ، كلم عشرة من صديقات زوجته و سألهن إذا كن يعرفن هي فين لإنها مختفية من إمبارح . العشر صديقات كانت إجابتهم واحدة . مانعرفش هي فين .

و لما جه دور الزوجة في سؤال أصدقاء الزوج . تسعة من عشرة أصدقاء قالوا إن الزوج كان معاهم بصورة ما . واحد بس قال إنه مايعرفش الزوج فين .

إنتهت النكتة المستوردة . و هنا السؤال ، أي الأصدقاء " أصدق " . أصدقاء الزوجة أم أصدقاء الزوج ؟

الظاهر من النكتة / الحكاية  أن أصدقاء الزوج بيخدموه . تسعة من عشرة أصدقاء منحوا صديقهم غطاء لم يطلبه . دافعوا بطريقتهم عن صديقهم بغض النظر عن الصواب أو الخطأ .

و الظاهر أيضا من النكتة / الحكاية أن أصدقاء الزوجة أندال . كلهن دون إستثناء قلن " مانعرفش حاجة " .

لكن الحقيقة إن أصدقاء الزوج ورطوه و خلقوا له مشكلة لإن الموضوع كله لعبة . الزوجة السائلة كانت قاعدة جنب الزوج . هي عارفة هو فين . فقط بتخبر كذبه و كذب أصدقائه .

الصديقات الأندال ، لم يكن أندال بالعكس . بنفيهم معرفة مكان الزوجة أثبتن إن الزوجة مش كدابة .

أصدقاء الزوج ، المخلصين ، لم يفكروا و هم يوفرون غطاء لإختفاء الزوج إنه مثلا عمل حادثة و مرمي في المستشفى مستني اللي يدور عليه . إفترض تسع أشخاص إنه بيعط و مراته بتدور عليه .

أصدقاء الزوجة و لإنهم عارفين إن اللي محتاج غطاء بيطلبه صراحة و بيرتبه و لا يختفي فجأة أنكرن معرفتهن بمكانها ، لإن الإنكار خدمة .

المشهد السياسي المصري ملئ بنموذج أصدقاء الزوج ، المعروفين مجازًا بإسم المطبلاتية . عندنا ناس بيوفروا غطاء لأي فعل " يرتكبه " فريقهم . التطبيل لا ينتهي و زيه زي " التطبيل " للزوج في النكتة . ضرره أكبر من نفعه .

الناس دي بتطبل للحاجة و عكسها دون الإحساس بإنهم إرتكبوا ما يشين . مع إن الواجب لو صديقك ، فريقك ، " إرتكب خطيئة " هو توجيهه للطريق الصحيح ، أو في أسوء الأحوال السكوت عله يفهم إنه بيعك .

الفكرة إن زي ما الزوج بقى وضعه صعب نتيجة خدمة أصدقائه ، الفرق السياسية المصرية المختلفة بتدفع ثمن عالي نتيجة تطبيل جمهورها لها في الغلط قبل الصح .



الخلاصة : طبل بالعقل يا حسبو !


==========



خير الكلام :
حديث صحيح أخرجه البخاري في صحيحه والإمام أحمد في مسنده و الترمذي في سننه وغيرهم ولفظه في البخاري عن أنس رضي الله عنه قال: قال رسول الله صلى الله عليه وسلم: انصر أخاك ظالماً أو مظلوماً، فقال: رجل يا رسول الله صلى الله عليه وسلم أنصره إذ كان مظلوماً، أفرأيت إذا كان ظالماً كيف أنصره؟! قال: تحجزه أو تمنعه من الظلم، فإن ذلك نصره. 

Monday, February 24, 2014

هي الرجالة جرالها إيه



من حوالي عشر سنين كانت تربطني علاقة حب بشخص ما .
كان يماثلني في السن . مهندس شاب . متوسط في كل شئ . متوسط الوسامة . متوسط الثقافة . من أسرة متوسطة من الطبقة المتوسطة .

بني آدم عادي يعني .

كان هذا البني آدم العادي يبدأ يومه بمكالمتي . كان شغله بيبدأ قبل شغلي . كان لنا مكالمة صباحية أول لما أوصل الشغل . و بعد فاصل من العمل قد يتخلله رسائل قصيرة ، أو حوار سريع على الإنترنت كان لنا مكالمة تانية سريعة في فترة الراحة . ثم أخيرا مكالمة ( أنا مروحة ) .
بعد الضهر كان في خيارين . نخرج أو لو الظروف لا تسمح لنا مكالمة تانية . 

و في النهاية مكالمة " حتى النوم " .

كان هذا الحبيب العادي و المتوسط في كل شئ يفعل ما يراه ويعرفه الجميع على إنه الحد الأدنى .

كنت سعيدة رغم همس الصديقات ( مش بيجيب هدايا - بيعطلك عن مذاكرتك بمكالماته الكثير - مش بيعزمك في أماكن شيك )

و كان ما كان و ذهب الحبيب وذهبت أيامه .

و مرت السنين . و جاء من يدعي إهتماما و حبا .
لا مكالمة و لا رسالة و لا عزومة حتى على ساندوتش طعمية . في حين ينتظر أخينا (إخوانا لإنه مش أول واحد ) إني أتفهم حاجته لمساحة شخصية ، أهمية حريته و فوق ده كله إني أبذل مجهود لإرضائه .

هو صحيح عشر سنين فترة طويلة .. بس مش معقول العالم تغير للدرجة دي .


هو الرجالة جرالها إيه ؟


Saturday, February 15, 2014

الزوجة vs العشيقة




في حياة كل رجل إمرأتان .. واحدة بتحبه ومش مراته . و واحدة مراته و مش متأكده بتحبه ولا لأ .

يتزوج الرجال في هذا الجزء من العالم لإعتبارات عديدة ، أهمها على الإطلاق إجتماع كل الصفات التي يبغضها في المرأة في زوجته .

يشكو الرجل من المرأة الغبية ، الزنانة ، ظل أمها ، ذات الصديقات سيئات التأثير .. و لكنه يتزوجها ، علشان الظروف جت كده .

يمدح الرجل المرأة الذكية ، المتفهمة ، التي تترك له مساحة من الحرية ، التي لا تلعب ألاعيب النساء من كر و فر ، صاحبة الرأي و الشخصية التي لا تتأثر بالأم ولا الصديقات ..

لا يتزوج الرجل من هذه المرأة أبدا .. هذه المرأة هي العشيقة الأبدية ..

يتزوج بالأولى لإن الظروف جت كده .. و لا يتزوج بالثانية لإنه أو لأنها كده ..


عزيزتي المزة .. كوني له نكدية غير ذات شخصية ؛ يكن لك زوجا أبديا !


Thursday, November 28, 2013

نقطة نظام - عن الإرهابي



في درس في أفلام الكارتون مش عارف يوصل لشريحة كبيرة من الناس في مصر . درس العالم الشرير . الرجل الذي يستغل علمه لأذية البشرية

مافيش إرهابي جاهل ؛ الجاهل أداه . الإرهابي بالضرورة ذكي و متعلم . ثعبان ناعم ؛ لدغته بالقبر


الإرهابي مش هجام ؛ الإرهابي يقتل أبرياء من أجل قضية . معنى كده إنه عنده عقل للإيمان بقضية و الأهم عقل لتقييم قوة ضرباته


الإرهابي يستغل ضربات موجعة منتقاه من أجل دفع أطراف للإستسلام له .


ياريت بقى ماحدش يقول دي ناس متعلمة لا يمكن يكونوا ارهابيين .


كفاكم تجارة بالعبث ، شوية عقل .



Monday, October 7, 2013

عن النصيب



في كلمات بتسببلي نوبات عصبية ، منها كلمة النصيب .

النصيب ، كلمة مفضلة لدى الجميع . أول لما حاجة كان نفسك فيها ماتحصلش ، كل الناس هاتقولك مش نصيبك ، ربنا شايلك الأحسن .. إلى أخره من الردود المعلبة المحفوظة .


الفكرة إن مفهوم طبعا إن كل شئ في هذا العالم قضاء و قدر . و لو كنت من غير المؤمنين بالقضاء و القدر ، الصدفة أكيد هاتبقى لاعب أساسي في حياتك . النصيب هو إسم الدلع للصدفة و القدر و كل الغيبيات التي تدور هذا العالم المكور .


مشكلتي بقى ، إني مش بأفهم يعني إيه الواحد يستنى نصيبه


و ليه الناس بتطلب منك تستنى النصيب في حاجات و تلومك على الإنتظار في حاجات تانية .


مثال ، لو مثلا قررت تستنى نصيبك في وظيفة مرموقة ألف مين يقولك إنك غلطان و لازم تستعد و تدور و تطلب النصح و المساعدة من الأخرين .
لكن لو إشتكيت من إنك حبيت حد و هو قرر يخلع منك هاتلاقي بقى كلام من نوع كله نصيب ، إنت اللي بتسعي ، إصبر و نصيبك هايجيلك .

أولا ، مافيش أي نوع من السعي في إن حد يبدي إعجابه بك و تبادله المشاعر . حقيقة إنك عايز علاقة مش معناها إنك بتسعى ولا إنك " شرقان " على أي حاجة .

ثانيا ، ليه فكرة السعي مرفوضة . ليه زي ما بندور على وظيفة جادة مش من حقنا ندور على علاقة جادة .


ليه أصلا لازم نستنى النصيب .

ليه أصلا فيه حاجة إسمها نصيب ، بيصيب و يخيب .

ليه الدنيا مش بسيطة و كل اللي بيعمل اللي عليه بياخد اللي يستحقه ؟

و ماحدش يقول إن اللي تستحقه أكبر من اللي إنت عايزه و ربنا شايلك نصيبك اللي أحسن بعدين

إحنا حياتنا بتضيع في إنتظار الأحسن اللي متشال عند ربنا بعدين . و ممكن عادي جدا و إنت بتعمل اللي عليك و مستني اللي متحوشلك ربنا يبعتلك مرض كارثي يعذبك كام سنة و تموت .

و وقتها الناس برضه هاتقولك الصبر ، ده تخليص ذنوب و ربنا شايلك الأحسن .



لما إحنا راضيين بالحسن بس .. ليه النصيب دائما أحسن و دائما متشال ؟