صدام!

هو: إنت عايزة ايه؟

هي: أنا عايزاك

هو: ما أنا أهو .. عايزة ايه؟

هي: عايزاك!

أشباح

- أنا بقيت أسمع صوتك في دماغي بشكلين. بسمعك زمان ويسمعك دلوقتي.

- إيه الفرق؟ أنا ما اتغيرتش.

- لا زمان كنت بترميني على آخر دراعك. 

- وبطلت؟

- مش عارفة

- ما تخافيش..

- دار ابن لقمان على حالها.. والقيد باق والطواش صبيح

هذا الخوف

هو موفر مظلة آمان جميلة جدا. جميلة لدرجة إني خايفة أتعود عليها. خايفة أركن لوجودها لأصبح ما ألاقيهاش. 

تضارب مصالح

هو: مافيش سبب لكل الهري ده. 

هي: ده في نظرك!

هو: لا .. إنت بتحبي الدراما.

هي: يمكن.

هو: قولي طيب.

هي: عجيبة!

هو: ما بلاش تنرفزيني

هي: بتتلكك ليه؟

هو: إيه العجيب.

هي: العجيب إنك عايز تسمع.

هو: قلة مزاج على الفاضي.

هي: اهو، شوفت!

هو: شوفت ايه.

هي: شوفت اللي بتعمله.

هو: بعمل ايه؟

هي: بتربيني!

فاكهة محرمة

هو: الجواز خنيق .. الجواز بيقتل كل حاجة. نتجوز ليه؟

هي: الجواز هيوفرلنا أوضة مقفولة علينا وسرير. والأهم إن كل الناس هتبقى عارفة اننا نايمين مع بعض ورا الباب ده وهيبقوا مرحبين. 

هو: مش مهم الناس

هي: بلاش الناس .. أهلي وأهلك. لو نمنا مع بعض من غير جواز هيعملوا لنا مشاكل. لكن لو اتجوزنا هيعملوا لنا مشاكل لو ما نمناش مع بعض!

هو: *ضحك هستيري* 

تكلفة الفرصة البديلة

هي: بتغير عليا؟

هو: لا!

هي: هتغير عليا؟

هو: .. لا!

هي: ليه؟

هو: ما أقدرش على ثمنها .. 

فراسة؟

لسبب ما غير مفهوم استوسمت فيه رجولة. لسبب ما غير مفهوم قررت إني أقول له حاجات عارفة إنها بتخلي الرجالة تهرب.

لسبب ما غير مفهوم قررت أحرق كل الكباري.

لسبب ما غير مفهوم عارفة انه هيجي رغم الكباري المحروقة. 

هيعدي .. هيجي طاير.

أنا عايزاه يجي طاير.  

بس مش متأكدة إذا كان إحساسي فراسة ولا أوهام. 

حيرة

هي: مش بتغير؟

هو: لا!

هي: ليه؟ 

هو: عارف إن ماحدش هيعرف ياخد مكاني في قلبك.

هي: بس ممكن يعرف ياخد مكانك في حياتي ...

هو: *يقبلها في صمت* 

كذب!

هو: أنا! أنا كذبت عليك؟! أنا؟! إمتى؟ فين؟ إزاي؟!

هي: مش قلت ما بتحبنيش؟!

هو: ما أنا ما بحبكيش!

هي: كذاب ... 

ثقة!

هي: بتغير عليا؟

هو: لا ...

هي: ليه؟ 

هو: ثقة!

هي: ثقة في نفسك ولا ثقة فيا؟

هو: الإثنين.

هي: الإثنين مش في محلهم ... 

علاقة العشر دقائق

هي: عارف المشكلة ايه؟

هو: لا مش عارف. أصلا مش شايف إن في مشكلة!

هي: لا في مشكلة ..

هو: إيه هي؟

هي: إنت صح!

هو: فين المشكلة؟ ما أنا دائما صح!

هي: لا مش دائما .. مش عايزة أقول إنك أحيانا حمار علشان ما تزعلش.

هو: ما إنت قلتي خلاص. ليه حمار بقى؟

هي: إنت صح. أنا عندي متطلبات لازم توفيها علشان علاقتنا تستمر.

هو: يعني أنا مش حمار أهو.

هي: لا حمار .. علشان المتطلبات دي كلها لا تزيد عن عشر دقائق في يومك. 

هو: يعني إيه؟

هي: يعني إلتزامك تجاهي لم يكن ليتجاوز العشر دقائق من يومك، الصباح والمسا ويمكن وحشتيني وسط اليوم. ما يكملوش العشر دقائق. ده كان كل المطلوب منك.

هو: *صمت*

هي: عارفة إنك حتى العشر دقائق شايفهم كثير.

هو: ما إنت قلتي .. حمار! 

هي: *صمت* 

إنجاز

زمان كان التعبير عن الإمتنان لشريك بياخد أشكال بسيطة، هدية مثلا أو كلمة حلوة أو أحيانا إحتفال عائلي في مناسبة خاصة. مسرحية التعبير عن الإمتنان كانت محصورة في الروايات والأفلام.

دلوقتي الفيسبوك سهل المسرحية. كلمتين مزوقين منقوشين وضغطة زر تعمل تاج لإسم الشخص وتقول قد ايه إنجازك ما كان ليكون لولاه. شهادة، ترقية وكل حاجة ثانية تصنف كإنجاز وتستحق إظهار الإمتنان. 

الفيسبوك أتاح إننا نسجل محطاتنا الهامة وأتاح كمان إننا نعلن للعالم شركائنا في الرحلة وإمتنانا لهم.

=== 

هي: أنا ماعنديش إنجاز يخليك تفخر بيا. ماعنديش هدف وصولي له يستحق أني أفرج الدنيا عليه.

هو: مش مهم .. إنت كفاية

هي: بس أنا ممتنة لوجودك في حياتي لإن لولا وجودك كان في حاجة مش هعرف أعملها.

هو: إيه؟

هي: النفس!

===

وهذا ما لن يستطيع الفيسبوك أبدا تسجيله.

ميل طبيعي للحزن

هو: مالك

هي: ماليش!

هو: طيب ..

هي: أنا ماعنديش طاقة للحزن

هو: بلاش دراما!

هي: ولا طاقة للدراما .. 

هو: كويس

هي: مش كويس .. مش هقدر أمسك فيك، مش هقدر أوعدك إني أكون موجودة. ماعنديش طاقة للدراما، فمش هقدر أتحملها منك.

هو: ممتاز 

هي: وعلشان عارفة انه ممتاز، بقولك ماعنديش طاقة للحزن. 

هو: مافيش حزن.

هي: مافيش حزن.

إيمان؟

هي: عارف إيه أكثر حاجة بتدهشني فيا؟ فينا؟

هو: إيه؟

هي: قدرتنا على التناسي. قدرتنا على مسح تاريخ منغصاتنا والإنغماس الكامل في لحظات السعادة.

هو: دي بيسموها "المغفرة".

هي: أو يمكن هو ده الإيمان. هو الإيمان إيه غير إننا نتوقع الجيد مهما رأينا من سوء؟!

هو: اللهم قوي إيمانك .. إيماننا.

هي: تفتكر ده إيمان فعلًا ولا هبل؟ إني أنسى .. أنسى نفسي وأنساك، والأهم أنسى تاريخنا المشترك؟

هو: قلتلك إن دي إسمها المغفرة. الحسنات يذهبن السيئات. كان في بينا سيء يمحوه في كل لحظة كل حسن. 

هي: لكن المغفرة لا تضمن عدم العودة للذنب .. ذات الذنب، وأكثر. تفتكر تكرار المغفرة ممكن؟ 

هو: أكيد .. 

هي: ستعود لذنبك؟

هو: .... 

هي: تفتكر في "مغفرة" من غير "توبة"؟

هو: ...

هي: تفتكر التناسي "إيمان" ولا "هبل"؟

هو: إستغفري لذنبك .. 

هي: حبك ذنب لا يغفر.

عودة

هي: لو مشيت المرة دي ما ترجعش!

هو: ما أقدرش ما أمشيش. وكمان ما أقدرش ما أرجعش ...

إنهاك!

هي: إنت زهقت؟

هو: لا!

هي: رجعت في كلامك؟

هو: لا!

هي: في إيه؟

هو: في حد ثاني؟

هي: مافيش ..

هو: لا في حد ثاني. وإنت للمرة المليون بتهيني ذكائي ومشاعري.

هي: لا مافيش. وهي دي المشكلة. المشكلة إن مافيش غيرك. بيجوا ويمشوا وما يفضلش منهم حاجة. 

هو: يعني كان في!

هي: لازم يكون في! إنت ما إستنتنيش علشان أستناك!

هو: بطلتي تحبيني؟

هي: عمرك ما غيرت عليا!

هو: أنا مش غيران. إنت حرة تعملي الي إنت عايزاه

هي: أديك قلت ..

هو: *صمت*

هي: لا ما بطلتش أحبك. لسة جوايا مشاعر جميلة تجاهك. ورغبة في القرب منك. مشاعر مربكة ومفسدة. مشاعر مولدة للحسرة. حسرة فراقك وحسرة عدم القدرة على الإحتفاظ بغيرك. لا ما بطلتش أحبك. بس حبك منهك، ومحاولات تجاوزه منهكة، ومحاولات تجاهله منهكة. أنا ما بطلتش أحبك، أنا تعبت. بس!

هو: *همهمة*

هي: *صمت*

هذا العبء!

من فترة أرسلت لرجل أحبه أطلب لقائه. كان طلبي واضحًا ومباشرًا "إعزمني على العشا". كنت في أمس الحاجة إلى "صحبته". كنت في حاجة لفاصل من الدلع، أشعر فيه بأنوثتي دون أن تهددني هذه الأنوثة. كنت في أمس الحاجة لساعتين من الكلام المشبع. كنت أحتاج لغسيل عاجل للروح. أرسلت له وتمنيت ألا يرفض ولكنه رفض. 

لم يكن رفضه مفاجئة، ولم يكن جديدًا. لم يكن أول رجل أحبه وأطلبه وقت حاجة فيردني "بلطف". كما لم يكن أول رجل "يراجع نفسه" فيعود "ليفاصل" في تلبية طلبي ولكن بشروط. كانت شروطه بسيطة، ولكنني وجدتها مجحفة في وقتها. فشل الفصال. ولكنني وجدت "اللي يعزمني على العشا"  و"يحسسني بأنوثتي" دون أن تكون هذه الأنوثة مصدر تهديد. 

لم يكن الشخص الذي لبى إحتياجي "بلطف" حبيبَا جديدًا، كان صديق. إختار مطعمي المفضل، ومنحني سهرة من الطعام الذيذ والكلام العميق والتدليل للأنثى دون تهديدها "برغباته". 

لم يكن هذا الصديق أول صديق "يلبي بلطف" حاجة من حاجاتي. رجل أخر ظننته حبيبًا طلبت إليه أن يصحبني في "مشوار رخم" تهرب مرة ومرة وفي الأخيرة قال إنه مشغول ويجب علي أن أصطحب  صديقة بدلًا منه. وفي حين كان يتهرب ويتحجج عرض صديق أن يصحبني دون حتى أن أطلب منه. لإن "المشوار كان رخم فعلًا وثقيلًا على قلبي جدًا جدًا".

تكررت ذات المواقف مع "أحبة" آخرين. كل "الأحبة" يتهربون ويردونني "بلطف" وأحيانًا يراجعوا مواقفهم ويقرروا "الفصال" والمساومة، أرض مقابل أرض، خطوة منهم مقابل خطوات مني .. إلخ إلخ.

الأمر الملفت، أن ذات الأحبة قبل أن ينالوا مكانة "الأحبة" كانوا في توددهم "أصدقاء" يلبون الإحتياجات بلطف دون أن يُسألوا. 

ربما المشكلة في منزلة "الأحبة". ربما المحبة "عبء"، يستلزم الفصال للوصال. 

ربما! 

هرطقة!

هو: أنا مش عارف إنت إتغيرتي ليه! 

هي: *صمت*

هو: إنت عارفة من الأول إن في غيرك!

هي: *صمت*

هو: هي زيهم .. وإنت عارفة مكانك 

هي: *صمت*

هو:  *صمت*

هي:  إِنَّ اللَّهَ لاَ يَغْفِرُ أَن يُشْرَكَ بِهِ وَيَغْفِرُ مَا دُونَ ذَلِكَ لِمَن يَشَاء وَمَن يُشْرِكْ بِاللَّهِ فَقَدِ افْتَرَى إِثْمًا عَظِيمًا 

عفوا لقد نفذ رصيدكم!

بتصحى الصبح. تشرب القهوة. تتصفح الأخبار. تشتبك في التعليق على الأخبار. تصون شبكاتها الاجتماعية المختلفة.
تعمل قليلا وتلعب كثيرا. ثم تحضر الطعام. وتعتني بالأسرة. ثم فقرة سمر. والمزيد من الأخبار والإشتباكات. والكثير من العمل والقليل من اللعب.
تحاول النوم، يمنعها القلق. تبحث عن صديق أو صديقة أو إشتباك سياسي.
الكثير من التفكير والكثير من القلق.
تنام. يقطع نومها كابوسا أو ربما اثنين.

ثم تعيد الكرة .. قهوة وأخبار وصيانة لعلاقات إجتماعية أغلبها وهمية. وإنغماس في أخبار وعمل ولهو وأسرة وقلق والقليل جدا من النوم .. والكثير جدا من العدمية.

تبحث في مخزونها العاطفي عن شحنة تعينها على إستكمال دائرة الصباح والقهوة والقلق ولكن يفاجئها الرد

عفوا لقد نفذ رصيدكم!

رسائل إلى آرثر - 5

العزيز آرثر

تنتابني نوبات غريبة من ضيق الصدر. كأن قلبي يصرخ في سجنه. يتألم ويصبح حتى النفس مستحيل. أشعر بخدر يتسلل في جسدي.

ألم .. ألم لا ينتهي

يصرخ عقلي مذعورًا "أنا عايزة حضن".

أبحث عنه ولا أجده .. لا أجدك .. لا أجد بديلًا

عارف الحضن؟

حين تطوقني بحبك قبل ذراعيك. حين يتوقف قلبينا للحظة ليعودا للنبض في إتساق. حين تهدأ أنفاسي وتعود الحياة لأطرافي.

يضيق صدري .. ولا أجدك

أنا عايزة حضن!