صدام!

هو: إنت عايزة ايه؟

هي: أنا عايزاك

هو: ما أنا أهو .. عايزة ايه؟

هي: عايزاك!

أشباح

- أنا بقيت أسمع صوتك في دماغي بشكلين. بسمعك زمان ويسمعك دلوقتي.

- إيه الفرق؟ أنا ما اتغيرتش.

- لا زمان كنت بترميني على آخر دراعك. 

- وبطلت؟

- مش عارفة

- ما تخافيش..

- دار ابن لقمان على حالها.. والقيد باق والطواش صبيح

هذا الخوف

هو موفر مظلة آمان جميلة جدا. جميلة لدرجة إني خايفة أتعود عليها. خايفة أركن لوجودها لأصبح ما ألاقيهاش. 

تضارب مصالح

هو: مافيش سبب لكل الهري ده. 

هي: ده في نظرك!

هو: لا .. إنت بتحبي الدراما.

هي: يمكن.

هو: قولي طيب.

هي: عجيبة!

هو: ما بلاش تنرفزيني

هي: بتتلكك ليه؟

هو: إيه العجيب.

هي: العجيب إنك عايز تسمع.

هو: قلة مزاج على الفاضي.

هي: اهو، شوفت!

هو: شوفت ايه.

هي: شوفت اللي بتعمله.

هو: بعمل ايه؟

هي: بتربيني!

تكلفة الفرصة البديلة

هي: بتغير عليا؟

هو: لا!

هي: هتغير عليا؟

هو: .. لا!

هي: ليه؟

هو: ما أقدرش على ثمنها .. 

فراسة؟

لسبب ما غير مفهوم استوسمت فيه رجولة. لسبب ما غير مفهوم قررت إني أقول له حاجات عارفة إنها بتخلي الرجالة تهرب.

لسبب ما غير مفهوم قررت أحرق كل الكباري.

لسبب ما غير مفهوم عارفة انه هيجي رغم الكباري المحروقة. 

هيعدي .. هيجي طاير.

أنا عايزاه يجي طاير.  

بس مش متأكدة إذا كان إحساسي فراسة ولا أوهام. 

حيرة

هي: مش بتغير؟

هو: لا!

هي: ليه؟ 

هو: عارف إن ماحدش هيعرف ياخد مكاني في قلبك.

هي: بس ممكن يعرف ياخد مكانك في حياتي ...

هو: *يقبلها في صمت* 

كذب!

هو: أنا! أنا كذبت عليك؟! أنا؟! إمتى؟ فين؟ إزاي؟!

هي: مش قلت ما بتحبنيش؟!

هو: ما أنا ما بحبكيش!

هي: كذاب ... 

ثقة!

هي: بتغير عليا؟

هو: لا ...

هي: ليه؟ 

هو: ثقة!

هي: ثقة في نفسك ولا ثقة فيا؟

هو: الإثنين.

هي: الإثنين مش في محلهم ... 

حسد ..

هي: لو شوفت البنات وهم متنحين فينا كنت قلقت نفس قلقي. 

هو: *مبتسما* بطلي مبالغة

هي: وحياتك إنت الحقد كان باين على وشهم. لم يكلفن أنفسهن حتى عبء إخفائه.

هو: ليه ده كله؟ 

هي: بيحقدوا عليا علشان سعيدة معاك. 

هو: يا ساتر. ليه كده.

هي: ما كل واحدة في حياتها واحد منكد عليها ومنكدة عليه. لكن أنا أيامي في قربك كلها سعادة.

هو: يا سيدي .. طيب كويس إنك سعيدة. ما تخافيش من الحسد. وسيبيهم الحقد ياكلهم.

هي: أقولك سر؟

هو: خير! 

هي: مش مفروض إنهن يحسدوني. المفروض أنا أحسدهم.

هو: تحسديهم على إيه؟ 

هي: هن يحسدنني على السعادة. لا تدرك أيهن أنني لا أستطيع مثلا أن أحاول ممارسة "النكد" في محيطك. 

مافيش واحدة فيهم تعرف اننا سعداء علشان مش مسموح بالزعل. مافيش واحدة فيهم تعرف ان في الوقت اللي هي بتنكد

 على اللي معاها ويرجعوا يتصالحوا. أنا ما أعرفش أعمل كده. 

لو نكدت عليك هننتهي .. مهما كانت الأسباب. 

هو: وإنت زعلانة؟ 

هي: هو أنا أقدر؟

هو: بحسب .. تعرفي، شكلهم حسدونا فعلا 

هي: مش قلت الحسد خرافات؟

هو: الحسد خرافات .. كلامك مش خرافات

هي: آخر مرة .. 

هو: ... 

علاقة العشر دقائق

هي: عارف المشكلة ايه؟

هو: لا مش عارف. أصلا مش شايف إن في مشكلة!

هي: لا في مشكلة ..

هو: إيه هي؟

هي: إنت صح!

هو: فين المشكلة؟ ما أنا دائما صح!

هي: لا مش دائما .. مش عايزة أقول إنك أحيانا حمار علشان ما تزعلش.

هو: ما إنت قلتي خلاص. ليه حمار بقى؟

هي: إنت صح. أنا عندي متطلبات لازم توفيها علشان علاقتنا تستمر.

هو: يعني أنا مش حمار أهو.

هي: لا حمار .. علشان المتطلبات دي كلها لا تزيد عن عشر دقائق في يومك. 

هو: يعني إيه؟

هي: يعني إلتزامك تجاهي لم يكن ليتجاوز العشر دقائق من يومك، الصباح والمسا ويمكن وحشتيني وسط اليوم. ما يكملوش العشر دقائق. ده كان كل المطلوب منك.

هو: *صمت*

هي: عارفة إنك حتى العشر دقائق شايفهم كثير.

هو: ما إنت قلتي .. حمار! 

هي: *صمت* 

تدمير ذاتي

هي: أنا مش قادرة أبطل زن 

هو: ليه؟ بتزني ليه؟

هي: مش عارفة بزن ليه. ومش عارفة أبطل زن. وعارفة إنك هتطفش من زني.

هو: طيب لما أنت عارفة إني هطفش بتزني ليه. 

هي: علشان أشوف هتطفش فعلا ولا لأ.

هو: تفتكري ايه؟

هي: هتطفش! 

هو: طيب ايه؟ 

هي: .... 

هو: بطلي زن .. وممكن أطفش برضه. بس لازم تبطلي زن.

هي: ليه؟ 

هو: علشان انت عارفة .. انك مش ضحية. 

هي: مين قال اني ضحية؟

هو: إنت بتزني علشان تطفشيني علشان تفضلي انت البنت المسكينة اللي بتعمل كل حاجة علشان حبيبها وهو شرير مش قادر يتسحمل تقلباتها المزاجية.

هو: إنت مش ضحية .. إنت حرة بقدر ما أنا حر. الحرية تجمعنا .. القيود تفرقنا. 

هي: مش فاهمة!

هو: لا إنت فاهمة كويس. لو مش فاهمة ما كنتيش زنيتي. 

هي: أنا خايفة!

هو: خايفة من إيه؟

هي: عليك، علينا .. بس في الأغلب خايفة منك.

هو: خايفة مني أنا!

هي: .. الحقيقة لا. أنا مش عارفة أنا خايفة من ايه.

هو: إنت خايفة تعترفي لنفسك إنك حرة. خايفة تعترفي إنك مرتاحة برة القالب. 

هي: خايفة علشان حاسة اني بقع.

هو: ليه شايفة انك بتقعي. ليه مش شايفة إنك لأول مرة طايرة؟

هي: أنا خايفة ..

هو: إنت مش خايفة. إنت قلقانة. القلق عادي وصحي. بس لازم يكون في حدود. شغلي عقلك.

هي: استحملني 

هو: إنت حرة! 

هي: يعني مش هتستحملني؟

هو: أنا مستحملك. بس إنت مش هتبطلي زن. كل لما هفوت وأطنش كل لما هتلاقي حاجة جديدة وحجة جديدة وباب جديد بينا تقفليه. 

هي: بس ..

هو: أسكتي خالص! إنت حرة تختاري. يا تسيبي الأبواب بينا مفتوحة. يا تقفليها وتقعدي تندبي حظك وتستمتعي بدور الضحية.

هو: خليكي فاكرة .. إنت مش ضحية. مش ضحية أي حاجة غير إختيارك. 

هي: ... 

هو: بطلي زن! 

كلكم ككلكن

هو: كلكن عندي سواء 

هي: بس ما تقولش كلكن

هو: إنت عارفة ان في غيرك. وأنا عدل!

هي: وإنت عارف إنك مش أول واحد. 

هو: الأخير؟ 

هي: تلك أمانيهم! 

هو: زيك زي غيرك ...

هي: عمر ما كان زيك زي غيرك. حبيتك غير ما حبتهم. وحبيتهم غير ما حبيتك. كلكم كان الأول حتى ولو أتى في الترتيب الأخير.

هو: أنا الآخر؟

هي: فيك الخصام وأنت الخصم والحكم

هو: أنا العدل! 

إنجاز

زمان كان التعبير عن الإمتنان لشريك بياخد أشكال بسيطة، هدية مثلا أو كلمة حلوة أو أحيانا إحتفال عائلي في مناسبة خاصة. مسرحية التعبير عن الإمتنان كانت محصورة في الروايات والأفلام.

دلوقتي الفيسبوك سهل المسرحية. كلمتين مزوقين منقوشين وضغطة زر تعمل تاج لإسم الشخص وتقول قد ايه إنجازك ما كان ليكون لولاه. شهادة، ترقية وكل حاجة ثانية تصنف كإنجاز وتستحق إظهار الإمتنان. 

الفيسبوك أتاح إننا نسجل محطاتنا الهامة وأتاح كمان إننا نعلن للعالم شركائنا في الرحلة وإمتنانا لهم.

=== 

هي: أنا ماعنديش إنجاز يخليك تفخر بيا. ماعنديش هدف وصولي له يستحق أني أفرج الدنيا عليه.

هو: مش مهم .. إنت كفاية

هي: بس أنا ممتنة لوجودك في حياتي لإن لولا وجودك كان في حاجة مش هعرف أعملها.

هو: إيه؟

هي: النفس!

===

وهذا ما لن يستطيع الفيسبوك أبدا تسجيله.

ميل طبيعي للحزن

هو: مالك

هي: ماليش!

هو: طيب ..

هي: أنا ماعنديش طاقة للحزن

هو: بلاش دراما!

هي: ولا طاقة للدراما .. 

هو: كويس

هي: مش كويس .. مش هقدر أمسك فيك، مش هقدر أوعدك إني أكون موجودة. ماعنديش طاقة للدراما، فمش هقدر أتحملها منك.

هو: ممتاز 

هي: وعلشان عارفة انه ممتاز، بقولك ماعنديش طاقة للحزن. 

هو: مافيش حزن.

هي: مافيش حزن.

إيمان؟

هي: عارف إيه أكثر حاجة بتدهشني فيا؟ فينا؟

هو: إيه؟

هي: قدرتنا على التناسي. قدرتنا على مسح تاريخ منغصاتنا والإنغماس الكامل في لحظات السعادة.

هو: دي بيسموها "المغفرة".

هي: أو يمكن هو ده الإيمان. هو الإيمان إيه غير إننا نتوقع الجيد مهما رأينا من سوء؟!

هو: اللهم قوي إيمانك .. إيماننا.

هي: تفتكر ده إيمان فعلًا ولا هبل؟ إني أنسى .. أنسى نفسي وأنساك، والأهم أنسى تاريخنا المشترك؟

هو: قلتلك إن دي إسمها المغفرة. الحسنات يذهبن السيئات. كان في بينا سيء يمحوه في كل لحظة كل حسن. 

هي: لكن المغفرة لا تضمن عدم العودة للذنب .. ذات الذنب، وأكثر. تفتكر تكرار المغفرة ممكن؟ 

هو: أكيد .. 

هي: ستعود لذنبك؟

هو: .... 

هي: تفتكر في "مغفرة" من غير "توبة"؟

هو: ...

هي: تفتكر التناسي "إيمان" ولا "هبل"؟

هو: إستغفري لذنبك .. 

هي: حبك ذنب لا يغفر.

تسونامي!

هو: إيه؟

هي: مش كل حاجة ينفع تتقال.

هو: ليه؟

هي: علشان اللي هقوله مش هيعجبك

هو: هتقولي حاجة تزعلني؟

هي: مش بالضرورة .. هي ممكن ما تزعلكش، بس بكل تأكيد هتغرقنا

هو: تغرقنا؟

هي: أه .. تغرقنا. المحبة ثقيلة وإحنا خفاف ما نستحملش أقولك بحبك .. ما نستحملش أقولك بحبك ليه .. ما نستحملش أقولك كل اللي نفسي أقوله. 

هو: .....

هي: المحبة ثقيلة وإحنا خفاف .. خلينا عايمين! 

قصة قصيرة مرعبة

- مشيتي ليه؟

- أصلي حسيت بالأمان ..

- طيب مشيتي ليه؟

- أصلي خفت

- خفتي ولا حسيتي بالأمان؟

- إحساسي بالأمان في حضنك كان مخيف .. كان لازم أمشي !

عودة

هي: لو مشيت المرة دي ما ترجعش!

هو: ما أقدرش ما أمشيش. وكمان ما أقدرش ما أرجعش ...

إنهاك!

هي: إنت زهقت؟

هو: لا!

هي: رجعت في كلامك؟

هو: لا!

هي: في إيه؟

هو: في حد ثاني؟

هي: مافيش ..

هو: لا في حد ثاني. وإنت للمرة المليون بتهيني ذكائي ومشاعري.

هي: لا مافيش. وهي دي المشكلة. المشكلة إن مافيش غيرك. بيجوا ويمشوا وما يفضلش منهم حاجة. 

هو: يعني كان في!

هي: لازم يكون في! إنت ما إستنتنيش علشان أستناك!

هو: بطلتي تحبيني؟

هي: عمرك ما غيرت عليا!

هو: أنا مش غيران. إنت حرة تعملي الي إنت عايزاه

هي: أديك قلت ..

هو: *صمت*

هي: لا ما بطلتش أحبك. لسة جوايا مشاعر جميلة تجاهك. ورغبة في القرب منك. مشاعر مربكة ومفسدة. مشاعر مولدة للحسرة. حسرة فراقك وحسرة عدم القدرة على الإحتفاظ بغيرك. لا ما بطلتش أحبك. بس حبك منهك، ومحاولات تجاوزه منهكة، ومحاولات تجاهله منهكة. أنا ما بطلتش أحبك، أنا تعبت. بس!

هو: *همهمة*

هي: *صمت*